Shakhtar hmaah Real Madrid an tlawm

UEFA Champions League-a record nei ṭha lawr lak Real Madrid-in Nilaini zan khan Shakhtar Donetsk 3-2 in an hneh lo. Los Blancos hian tun kartawpah Nou Camp-ah Barcelona an hmachhawn zui dawn a, Shakhtar laka an result hian El Clasico atan phurna a pe lo ang.

Ukrainian champion hian Covid-19 vangin an first team player 13 an chhawr thei lo a, youth team aṭangin player koh hial an ngai chungin Alfredo di Stefano training ground-ah Spanish club lian hi an hneh.

European champion vawi 13 ni tawh Real Madrid hi an record thlirin tlaw tih a thiang lo a, amaherawhchu Shakhtar Donetsk nen an inkhelh ṭumah erawh hun chanve hmalamah an tlarhnung a pawp takzet.

Real hian inhliam vangin Sergio Ramos an chhawr thei lo a, captain tel loin Shakhtar-in awlsam takin Spanish club tlarhnung an pal darh. Real defender Varane leh Marcelo te chetsual vangin captain Marlos-a'n keeper Thibaut Courtois chiah a hmachhawn hnuah goal-ah a chantir thei lo. 

Zinedine Zidane-a hoten tlarhnung an siam ṭhat theih loh avangin Brazilian midfielder Tete-a'n minute 29-naah goal hmahruai a khung. Shakhtar an che ṭha chhunzawm a, Tete-a ball pet keeper Courtois-a'n a dan per avangin Raphael Varane-a'n an lamah a su lut.

Real Madrid an talbuai chhunzawm a, minute 42-naah Manor Solomon-a'n Shakhtar goal thumna a khung a, Los Blancos tlarhnung bawk chu dem tur an ni. An mualah Spanish club an che thei lo a, mualpho takin dressing room an pan.

Halftime-ah Real Madrid an in fuih ṭha a, second half ṭan phat aṭangin an nawr ṭan. Shakhtar erawhin an siphurh humhim tumin tlarhnungah player an dah tam a, Los Blancos hmabak a harsa ta hle.

Amaherawhchu player ṭha danglam bikna a lang a, minute 54-naah Luka Modric-a'n box pawn aṭangin kawh pawtin a pet goal. Shakhtar insiamrem hmain Real-in goal hnihna an khung zui a, Vinicius Junior-a'n minute 59-naah ṭha taka lalutin goal ṭha tak a khung.

Real Madrid-in beiseina nei thar mah se first half-a an chetsual an tuar a, Shakhtar an ding khawng ve tlat avangin goal dang khung belh an harsat. Injury time-ah Federico Valverde-a'n kawh takin Real siphurh sutna goal a pet lutah a inngai a, amaherawhchu offside position-a awm Vinicius Junior-a'n keeper a hliah avangin goal-ah pawm a ni lo a, goal dang khungna hun a awm tawh lo.

Real Madrid hi tun hma anga player ṭha awm khawmna kha an ni tawh lo a, Cristiano Ronaldo chhuahsan hnuah phei chuan an hming 'Real Madrid' a lian em em a, hemi kawr hatute hi club dang awh em em an awm ta meuh lo.

Shakhtar nen an inkhelh ṭumah phei chuan Ramos a awm lo a, Karim Benzema leh Toni Kroos te bench-ah an awm. Tun hnaia an player lak manto ber Eden Hazard lah inhliam vangin an chhawr hman meuh lo. Bul ṭantu zingah Luka Modric hming langsar mah se kum 35 mi a ni tawh. Keeper Thibaut Courtois lah Los Blancos tana a khelh hnuah beisei a pha lo.

Zinedine Zidane-a'n nipui transfer-ah player langsar a lalut lo a, Shakhtar nena an khelh dan thlir chuan Champions League-a champion lam thlir rih loin group stage patlang hram dan an zawn a ṭul zawk. 

Real Madrid coach Zinédine Zidane chuan, "Kan khel chhe takzet. Chutihrualin second half-ah theihtawp kan chhuah tal a, a zia zia a awm. Hetianga khelh fuh loh chang hi chu a awm ṭhin a, coach ka nih angin a siam ṭhat hna ka thawh a ṭul a ni," tiin mawhphurtu a nih thu a sawi.