Lukaku-a'n Inter a chhan

Inter Milan-in Borussia Moncheng-ladbach an mikhual a, Romelu Lukaku goal hnih hmangin Italian club-in point khat hlu tak an hlawh chhuak. Champions League group B-ah club lian bera ngaih Real Madrid-in point an la hmuh loh avangin Inter leh Gladbach tan knockout stage luh a harsat phah sawt ang.

San Siro-ah Lukaku hmangin Inter-in hma hruai mah se  Borussia M'gladbach-in minute 63-naa Ramy Bensebaini penalty leh minute 84-naa Jonas Hofmann goal hmangin an lehthal. German club hi chak tura an inngaih hnuah Lukaku a rawn inlar a, minute 90-naah siphurh a sut.

Belgian striker Lukaku hian Europe inelnaah match kua chhung a zawnin goal a khung tawh a, season liam ta khan Champions League goal hnih a khung a, hemi hnu hian Europa League-ah goal sarih khungin player of the season a ni hial.

Inter Milan tan match 56-ah goal 40 a khung tawh a, Jurgen Klinsmann leh Ivan Perisic ten Nerazzurri tana an khung zat a nihrual der tawh. Club record a la hlat hle, Belgian striker hi Inter tana goal khung tam lamah 50-na a la ni pha chauh.