Kane-a goal hnih hmangin Bayern an chak

Harry Kane-a'n goal a khung chhunzawm zel a, Bayern Munich-in Bundesliga lamah table chung ber an luah zui - German club hian an mikhual Union Berlin chu 3-0 in an hneh a, Harry Kane chuan goal hnih a khung.

Bayern-in hnehna an chan lai hian RB Leipzig erawh an tlawm a, kartawp inkhelh hmaa Bayern nena an point hmuh zat inang Leipzig hian point thumin Vincent Kompany-a team hi an phak lo ta.

Tun hnaia beisei phak lo Borussia Dortmund chuan RB Leipzig hi 2-1 in an hneh a, mikhual team Leipzig tana Benjamin Sesko-a goal hmahruai chu Maximilian Beier leh Serhou Guirassy ten chhangletin, Dortmund an chak daih.

Hetihlai hian season hmasa champion Bayer Leverkusen an chak zo lo a, VfB Stuttgart nen 0-0 in an inhnehtawk. Xabi Alonso naute hi table-ah palina an ni mek a, Dortmund nen point 16 ve ve an nei - point sarihin Bayern an phak lo mek.

Kane-a vulna

Champions League-a Barcelona laka an mualpho hnuin Bayern an insiamṭha chiang hle - match thum khelin goal 12 an khung a, an lamah goal khat mah a lut lo! Inrinni zanah match thum a zawna tlawm tawh lo Union Berlin chu 3-0 in an hneh leh ta.

Bayern tan striker form em em mai Harry Kane chuan goal hnih a khung a, goal hmasa ber chu penalty aṭangin a chhuih lut - Kinglsey Coman chuan goal khat a khung ve bawk a, hei pawh Harry Kane-a siamsak tho a ni.

English striker hian tun season inelna hrang hrangah match 14 khelin goal 17 ngawt a khung ta a, assist vawi riat a nei bawk. Bundesliga bikah goal 11 a khungna chiah niin, top scorer a ni mek.

A career-a la champion ngai lo Kane hian champion duhin Bayern hi a pan a, mahse, champion lo bawkin season hmasa kha a thlah liam - champion duhin goal a khung leh ta mawlh mawlh a, German club pawhin nomawi nena lawmthu hrilh let an duh ngei ang.

Dortmund an chak

Nuri Sahin enkawl Dortmund-in tun season-ah beisei an phak lo. Champions League-a Real Madrid-in 5-2 a an sawp hnuin, league-ah Augsburg chu 2-1 in an ngam lo a, DFB Pokal second round-ah Wolfsburg chu 1-0 in an ngam lo bawk.

Match thum a zawna an tlawm hnuah club ṭha Leipzig an mikhual zui a, an club huat em em hi 2-1 in an lo hneh. Leipzig hian minute 27-naah Benjamin Sesko hmangin goal hmahruai an khung a, Dortmund hi tlawm leh mai tura ngaihna a awm hman.

Mahse, Signal Iduna Park-ah Dortmund an tho leh rang hle. Goal an chhuah aṭanga minute thum hnu lawkah Maximilian Beier chuan si phurh a sut a, Serhou Guirassy chuan second half-ah chakna goal a khung zui.

Kum 28 mi Guirassy hian nipui transfer khan VfB Stuttgart aṭangin Dortmund hi a zawm a, inelna hrang hrangah match 11 khelin goal riat a khung der tawh - an insiamṭhat dawn chuan Guirassy chet ṭhat zel a pawimawh ang.