Arsenal hnawl hnu Ozil inbun ruak

Premier League khel tur zingah telh a ni lo a, Europa League khel tur pawhin an duh chuang lo. A thlen san theih chin chu Under 23 team tana khelh mai a ni ta - Arsenal hnawl Mesut Ozil chuan twitter kaltlangin a dinhmun a sawifiah.

Kum 32 mi Ozil hian 2021 nipui thleng daih contract a la nei, a contract hi la rei viau mah se senior team tana a match hnuhnung ber chu a khel zo tawha ngaih a ni a, March 7 hnu lamah match a khel leh tawh lo.

Real Madrid aṭangin pound maktaduai 42.4 zetin an leilut a, 2013 a an lakluh lai khan club player manto ber a ni. A man a tam a, khelmual chhungah pawh a ṭangkai, goal khung tur siamsaktu a nih bakah Arsenal inkhel cheimawitu a ni bawk.

Arsenal fans lamin an ngaina a, contract duhawm pawh zawrh niin club player zinga hlawh hnem ber (£350,000) pawh a ni hial. Alexis Sanchez leh Aaron Ramsey ten club dang an zawm san laia cham tlang a nih avangin fans lamin an ngaina hi a mak lo.

Gunners tan hian FA Cup vawi thum a chawi tawh, Arsene Wenger-a'n thiam taka a hman kha Unai Emery awm chinah chuan a zuih chho ṭan ta. Season hmasa a FA Cup an champion leh meuh kha chuan squad-ah a hming tarlan a ni ve tawh lo thung.

Spanish manager Unai Emery khan tun hnaiah Ozil nen an inkar a sawi chhuak zauh a, captain atan hman duh hial mah se player dangten captain atan an duh loh thu a sawi a, club tana inpe tawk lo nia ngaiin khelmual chhungah pawh a chhawr zui ta lo.

Mikel Arteta a rawn lang a, a hun tir lamah Ozil hi a chhawr rim viau a, inkhel bul ṭantu zingah pawh a tel ṭhin. Mahse mak tak maiin zawi zawiin a thlauh thla tial tial. October 21 a lo thlen meuh chuan, "Ka hlawhchham" tiin Ozil chungchang a sawi ta.

Arteta chuan, "Ngaih-tuahna fim tak hmangin thutlukna ka siam, ka sawi theih chin chu football vanga thil tih a ni. Mesut nen ṭha takin kan inbe reng, kan lak aṭangin eng nge beisei tur tih chu kan inhre tawn bawk," a ti. Team tana theihtawp chhuah mi chu a duh zawng an nih thu a sawi bawk.

Premier League season kal laia Arsenal zinga khel tura ka tel ta lo hi pawi ka ti takzet, hun engemaw chen ka lo khelhsak tawh club chunga hetiang thu ziah a ngai mai hi harsa pawh ka ti hle.

A la rei lo, 2018 mai khan ka club hmangaih Arsenal tana rinawmna thu tiamin contract ka ziak a nih kha, amaherawhchu ka rinawmna thu tiam thlenga ka khel chhuk thei lo tur hian min ti lungngai takzet.

Tunlai ang boruak ah chuan club tana player rinawm tak nih a harsat zia ka hre chhuak. Hun rei tak chhung chu engtik ni ah emaw chuan ka la inkhel ve leh maithei a sin, tih beiseina nei chugin ka awm-chu vang chuan ka ngawi reng a nih kha.

Hripui coronavirus len hma khan, coach thr Mikel Arteta hnuaia kawng hrang hrangin hma ka sawn a, kei ngei pawh ka khel tha chho ve tan in ka inhria. Mahse thil a inthlak a, Arsenal tan ball ka pet ve pawh phal sak ka ni tawh lo!

Eng nge ka sawi tak ang le?

London khawpui hi ka tan chuan in ang a la ni reng, team zingah thian tha tak tak ka nei, fans nen pawh kan inpawhna a thuk hle.

Season riat chhung ka lo chenchilh tawh meuh mai Arsenal tana ka hun tawp hman dan hi ka duh dan a ni lo, kawng a inhawn leh theih nen theih tawpin ka bei zel ang.

Hei chauh hi ka tiam duh che u, Arsenal thutlukna hian ka rilru a thlak danglam lo ang. Training pawh ka theih anga tha in ka chhunzawm ang, mihring dikna chanvo humhim a nih theih nan leh, rorelna dik a awm theih nan hma ka la zel dawn.