Paris Masters khel lo tur Djokovic

Novak Djokovic chuan November 2-8 chhunga khelh tur Paris Masters lamah a hmel lan a tum lo, inelna a hmachhawn dawn loh chhan hi ranking point hmuh belh tur a neih lem loh vang niin a sawi.

Kum 33 mi Djokovic chuan, "Paris-ah ka inkhel lo a, a chhan chu world ranking point hmuh belh tur ka nei hran lo. Mahse Vienna leh London-ah erawh chuan ka inkhel thung ang.

"Season hmasa khan point 500 hmuh theihna Vienna-ah ka inlan lo, London-ah pawh point hmuh belh tur tam tak a awm," tiin a sawi a, tun dinhmuna world number 1 ni lai hian a chung bera awm chungin season hman zawh a tum hle.

Serbian tlangval hian thla hmasa khan Italian Open a la, a hnuah erawh Rafael Nadal a ngam loh avangin French Open nomawi chu a chawi ta lo. Paris Masters-ah hian Nadal a inlan zui dawn a, champion rinkai Djokovic erawh a inlan dawn ta lo a ni.

Mipa tennis thuneitu sang Association of Tennis Professionals chuan hri leng vangin ranking kalphung an ti danglam a, chuvang chuan Paris Masters-ah hian Djokovic hi champion lai ni mah se point a hmuh belh thei lo, a point neih sa a hum thei chauh zawk.

Grand Slam vawi 17 champion tawh Novak chuan, "Masters title la hnem ber nih hi ka tum ber a ni hran lo, kei chhuan ranking point tam thei ang ber hmuh ka duh a, world number 1 ni rei thei dinhmun luah chu ka ngai pawimawh hle.

"Ka elpui player dang-ten eng inelna nge an hmachhawn tih chu ka ngaih-tuah ber a ni lem lo, ka tana ṭha tur nia ka hriat angin ka kal mai ṭhin. Sulhnu ṭha neih ka duh a, nakina mitin kan chanchin an rawn en let hun pawha chhuanawm tak nih ka duh," a ti.