CYMA FOOTBALL A thiam 16 chauh an dam ta

C.T Group Cup Inter Branch YMA Football Tournament 2015 Round of 32 chu Inrinni khan khelh zawh a ni ta a. Tournamet ṭan tirh khan veng 191 zet inziak lut mah se tunah chuan a thiam zual veng/khua 16 chiah an bang tawh. Last 16 hi Lammualah vawiin aṭanga khelh ṭan leh nghal tur a ni ang.

Zirtawpni khan Armed Veng 'S' leh Durtlang inkhelh laiin buaina a chhuah avangin inkhelh tawp hma minute 13 la awmin inkhel tihtawp a ni a, a tuk Inrinniah khelh chhunzawm tur a tih a ni. Mahse, Inrinni hian Durtlang lamin khel chhunzawm kher loin 2-0 a hmahruaitu Armed Veng 'S' chu chakah an pawmpui ta a ni.

Inrinni inkhel hmasa zawkah Aizawl khaw pawn team ṭha East Lungdar chu Bawngkawn-in 3-1 in an hneh. East Lungdar tan Zotanpuia chuan minute 24-naah mual dinglam kil aṭangin mawi takin a thlawh lut a; mahse East Lungdar ṭantute au thawm pawh a reh fel hmain MS Dawngliana chuan a sût ve nghal. Bawngkawn lam hian minute 40-ah MC Malsawmzuala hmangin an hmahruaina goal an khung bakah Dawngtea hmangin minute 73 naah an goal thumna an khung bawk.

East Lungdar hian chance ṭha an hlohte an ui hle ang a, an khel chhe lo a, goal bulah an talbuai deuh mai a ni.

Republic Veng hi last 16 luh ngei tumin an thiampuipa F. Lalrinpuia hoin an rawn thawkchuak a, tlang ngei tur pawhin an lang hman. First hlaf-ah 2-0 in hma an hruai. Mahse, a tawpa an ngam loh chu H Lalnunzira a ni. Chanmari 'W' tlangval hian hat-trick siamin an khingpui Republic Veng chu 4-2 in an lehthal.

Republic Veng hian Lal­chhandama hmangin minute 33 leh 38-ah goal an khung. Second hlaf-ah Chanmari 'W' lam rawn ṭang mar ve lehin Vanlalbiaa chhangte goal khat leh H Lalnunzira goal thum khung hmangin 4-2 in an chak ta a ni.

Tun tournament-a inkhel hmuhnawm ber zinga mi a ni ngei ang.

Last 16 ṭan a ni dawn ta

Vawiin hian Lammualah C.T Group Cup Inter Branch YMA Football Tournament 2015 last 16 chu khelh ṭan a ni dawn a, inkhel hmasa zawk 1:00-ah Venghlui leh Tuivamit te an inkhel ang.

Inkhel hmasa zawk tur hi team intiat tawk leh intluk tawk an nih avangin chak zawk tur rinthiam a har hle. La champion lo ve ve an ni a, kuminah erawh kum dang aiin an inbuatsaihna a ṭh in team hlauhawm tak ve ve an ni.

Inkhel thawhhnihna hi tlai 3:00-ah YMA Football Tournament Champion hmasa ber leh champion ngun ber Armed veng leh Ramthar Veng ten an khel ang. Ramthar veng hi kum 2004 khan an lo champion tawh bawk.

Inkhel zawh rualin Aizawl FC lawmpuina hun a inṭan ang.