Blatter sawiseltu Figo

FIFA presidential can­didate zinga mi Luis Figo chuan Sepp Bla­tter chu kapin election campaign nei ngam lo leh ṭawng­chhuak ngam loah a puh.

Portuguese footballer ropui chuan, "Blatter a ngawi tlat mai hi chu thil mak tak a ni. Inthlan neih dawn reng reng chuan election programme kan ruahman a, kan thil tih tum te kan puangchhuak ṭhin. Tuna a ngawi tlat mai hian min barakhaih hle a ni," tiin Blatter a inthukru lutuk chu mak a tih thu a sawi.

Real Madrid player hlui chuan, "Football hmakhua tan eng ang ruahmanna nge a neih tih te sawi ve awm tak a ni a, engmah a sawi si lo. Football tan hmachhawp engmah a nei lo a ni maithei. Hmun ṭhenkhata a thusawi ka ngaihthlaknaah pawh hun kal tawh hlir a sawi ṭhin a, hun kal tawhah a la inhambuai a ni mahna," tiin kum 79-a upa FIFA pre­sident nilai chu a sawisel.

Tunhnaiah FIFA president chuh tur zinga mi Michael van Praag, Prince Ali bin Ali-Hussein leh Figo te hian inhmuhkhawm rawtin Blatter khing thla zo ber tur thlanchhuah a, thlawp rawn mai an rawt nia sawi a ni.

Kum 42-a upa Figo chuan, "Kan bul ṭan tirh aṭang tawh khan ka chak chuan loh tur thu min hrilhtu an tam em em a, mahse football ṭhat zawk nan leh FIFA kalzel dan tur ngaihtuah chungin huai takin ka rawn penchhuak a ni," a ti.