Vanneihna nen United-in UCL an hnaih

Manchester United-in Inrinni zan khan Crystal Palace 2-1 in an hneh hram a, nizan inkhela champion thar Chelsea-in an mikhual Liverpool an hneh chuan Louis van Gaal-a hote hian match hnih khelh hmabak nei chungin season thara Champions League khel turin an tling chiang ang.

Selhurst Park-ah vei lam aṭanga Ashley Young-a cross chu Palace defender Scott Dann-a'n a kutin a lo dang a, referee Michael Oliver thutlukna penalty chu mualneitu tan chuan hriatthiam a har khawp ang. Liverpool nena penalty hlah Wayne Rooney aiah Juan Mata rawn pen chhuakin minute 19-naah goal hmahruai a khung.

First half-ah goal chance a tam lo a, minute 40-naah inhliam Luke Shaw aiah Paddy Mc Nair a rawn lut a, second half ṭan tirhah inhliam vangin Rooney lak chhuah a ni a, a aiah Radamel Falcao a lut bawk.

Second half-ah Palace-in Jason Puncheon freekick hmangin minute 57-naah an sut a, wall-a ding Daley Blind dawihzep vanga goal-ah a ngaih theih. Field sirah goal khungtu Puncheon leh Yannick Bolasie te an hnawksak a, David de Gea-a'n ṭum dang ang bawkin United chhanhim zuiin Glenn Murray goal khung tur a dang ṭha hle.

Dutch manager Van Gaal-a hnuaia che ṭha Young leh Marouane Fellaini te an ṭangkai a, Young-a cross chu Belgium midfielder hian minute 79-naah a tauh goal a, chakna goal a ni zui bawk.

Match thum chak loh hnuah United-in khel ṭha lo chungin chak hmel an hmu ta a, an elpui ber Liverpool-in ho lam taka point hloh an ngah hret avangin season thara Champions League khel turin an dinhmun a ṭha tawh hle.

Crystal Palace manager Alan Pardew chuan, "Second half-ah khan team ṭha zawk kan ni a, kan chak theih loh tal pawhin draw kha chu ka beisei khawp mai. Tin, first half-a penalty kan chawina kha chu a dik loin ka hria, referee khan thutlukna siam turin a awmna hmun kha a ṭha tawk lo a ni," a ti.

Manchester United manager Louis van Gaal chuan, "Champions League khel turin point hmuh chu a la ngai a, amaherawhchu kan chak hi a pawimawh takzet. Kan thawkrim a, kan rilru a huaisen bawk avangin kan khingpui tan chuan hneh kan har khawp ang. Tun season-ah David de Gea-a'n ṭha tak takin a dang a, ani chu awm lo se Palace nen pawh khan 2-1 a chak lo thei kan ni," tiin Spanish keeper a fak.