Barca chak zanah Real chak zo lo
Inrinni zanah Spanish team lian pahnih an inlan a, hmahruaitu Barcelona-in Nou Camp-ah Real Sociedad 2-0 a an hneh laiin Real Madrid-in an khelmualah an thiampuipa Cristiano Ronaldo penalty khung loh an tuar a, an hneh ngei tura ngaih Valencia hneh zo lovin 2-2 in an inhnehtawk.
La Liga hmahruaitu Barcelona-in champion turin vawi khat chak chiah an mamawh tawh a, anmahni hnaih bertu Real Madrid aia point li laia sang falin match hnih chiah khelh tur awm tawhah champion tura Real Madrid beiseina a chau ta hle.
Barca dang thei an awm lo
Camp Nou-ah Barcelona-in khualmuala an lo hneh loh tawh Real Sociedad an mikhual a, an tisual nawn tawh lo. First half-ah beisei angin inkhel hmuhnawm hmuh tur a awm lo a, chawlhlawk hman zawh hnuin Barca tak tak kan hmu thung.
Second half ṭan aṭanga minute 55 naah Lionel Messi chuan Neymar tan ball ṭha takin a cross a, Brazil captain hian a hlah lo. An hmahruaina goal ni turin Sociedad goal-ah tauh lutin first half-a che ṭha tak Sociedad goalkeeper Geronimo Rulli tan dan theih a ni lo. Barcelona-in inkhel thunun mah se goal an khung leh lawk mai lo, minute 82 naa rawn tlan lut ve chauh substitute Pedro chuan 'bicycle kick' hmangin mawi lutukin an chak chianna goal a khung a, champion turin Barca hian vawikhat chak chiah an mamawh tawh.
Tunhnaiah Spanish Football Federation leh Spain sorkar inhmuhthiamloh vangin May 16 aṭanga ṭan turin Spain rama football match zawng zawng tihtawp a ni a, Sorkar hotute leh Spain football hruaitute hi an inberema La Liga an khel chhunzawm thei a nih chuan Barca-in an game hnuhnung pahniha an tum tur champion lai Atletico Madrid leh Deportivo La Coruna a pakhat zawk zawk an hneh pawhin an champion thei ang.
Enrique thukhawchang
Barcelona coach Luis Enrique chuan, "Point thum hlu tak kan hlawhchhuak a ni. Sociedad goalkeeper Geronimo Rulli khan first half-ah a khel ṭha em em a, second-half ah khan an chauh deuh tawh avangin keinin remchang kan lo la thung. Sociedad hi team ṭha tak an ni tih ka hria a, a harsa dawn tih hi kan hre lawk a ni," tiin Sociedad chuan an khelh ṭhat thu a sawi.
Real ti beidawngtu Diego Alves
Inrinni zanah Real Madrid-in khawvela player langsar ber ber Cristiano Ronaldo, Gareth Bale, James Rodriguez leh Isco te ho an rawn tlar a, inkhelh zawha langsar ber erawh Real tlar hma man to rual ti beidawngtu Valencia keeper Diego Alves a ni.
Inkhel ṭan aṭanga minute 13 na lekah Real-in Bale freekick hmangin hun ṭha an nei a, mahse crossbar a fuh hlauh. Minute nga a liam hman awrh tiha Ronaldo ball tauh chuan crossbar bawk a per leh. Beisei loh taka goal khung hmasa zawktu chu La Liga-a palina ni mek Valencia an ni. Minute 19 naah Alcacer Garcia chuan an hmahruaina goal rawn khungin minute 26 naa Fuego Martinez chuan a rawn chhunzawm ve leh. Real vanduai a kaltluang a, Chicharito-a'n goal post a pet per hnu lawkin Gareth Bale hlawhchhuah Ronaldo-a penalty pet chu Diego Alves-a'n a lo dang. Rin loh takin first half-ah Valencia-in 2-0 in hma an hruai a, Santiago Bernabeu-a Real fans authawm a reh.
Second half-ah Real-in an chance neih an chhawr ṭangkai ta nge nge a, minute 56 naa Pepe goal khung leh minute 84 naa Isco goal khung hmangin an si phurh an sut a, goal dang luhbelh tawh lo in 2-2 in inkhel an ṭin. Real tan La Liga-a champion turin an beiseina a chau ta hle.
Champion beisei tawh lo Pepe
Real defender Pepe chuan, "Second half-ah ṭha takin khel mah ila kan bul ṭan ṭhat loh kan tuar a, champion tur chuan kan tan kawng a bo tawh hle a ni," a ti.
Real manager Carlo Ancelotti chuan, "Tunah chuan a harsa lehzual tawh. Match hnih chauhn khelh tur a awm tawh a, kan chak ve ve hi a pawimawh ber chu a ni," tiin a tawp khar ṭhat a pawimawh thu a sawi.