Aizawl FC-in nomawi an chawi ta

Mizoram club pahnihin chak chungin I League Second Division an khar

May 6 khan Golaghat-ah Aizawl FC-in Siliguri-a an hneh loh Chanmari FC an hneh a, Lonestar Kashmir FC-in table hnuai lama awm Kenkre an draw vangin MPL3 champion hi season thara I League khel turin an tling.

Inrinni khan round tawp ber khelh a ni a, Aizawl FC-in Mohammedan SC an hmachhawn a, champion nemngheh nan 4-2 in an chak. Chanmari FC-in Phase 1-a an hneh loh Lonestar Kashmir lakah Lalbiakhlua goal hmangin phuba an la bawk.

Aizawl FC hian vawiinah Aizawl an lo lut dawn a, MFA chuan tlai dar 5;00-ah Lammualah lawmpuina hun a hmang dawn a, mi zawng zawng kal turin an sawm.

Champion phu Aizawl FC

Aizawl FC-in champion chiang tawh chungin match hnuhnung ber an la thutak a, defender Emma Chigozie tih loh chu Mizo hlangin an khel.

Mohammedan Sporting tan Bijendra Rai-a'n minute kuanaah goal a khung a, Somide Adelaja-a'n second half ṭan aṭanga minute hnihah Kolkata club goal hnihna a khung.

Goal hnih an chhuah hnuah Aizawl FC-in an zia an chhuah chauh a, William Lalnunfela'n minute 49-naah Aizawl FC goal hmasa ber a khung a, minute thum hnuah si phurh sutna goal a khung bawk.

Kolasib tlangval William hi tun hnaia Mizo zinga record nei ṭha a ni. MPL2-ah Chanmari FC a champion-pui a, 2014 Dr TAo Football leh Santosh Trophy champion team-ah a tel a, chumi hnuah Aizawl FC chu MPL3-ah champion pui a, National Games-ah Mizoram tan gold medal a la leh a, I League-a Aizawl FC hruai thlengtu a ni bawk.

Aizawl FC tan Immanuel HS Lalṭhazuala leh Laldampuia te'n goal an khung leh a, 4-2 in an chak.

Aizawl FC president Robert Romawia Royte chuan, "Kan team hian kan mamawh ang player kan lak luh a, training ṭha zawk kan neih bawk chuan I League team dangte kan el phak ngei ka ring. Khawvel hmaah Mizoramin football ngaina state kan ni tih kan lantir thei," a ti.

Lonestar ngamtu Chanmari FC

Chanmari FC-in Siliguri-ah 1-2 in Lonestar Kashmir an hneh lo a, hei hi an result ṭha tluanglai tichhetu a ni.

Golaghat-ah erawh a danglam ta - Lonestar chhuanvawr Ajay Singh aiin Lalbiakhlua a langsar zawk. Chanmari match hnuhnung berah hian an veng tlangval Rochhingpuia'n captain armband a hreng a, Biaktea hian minute 43-naah inkhela goal awmchhun a khung.

Chanmari hian point 25 hmuin palinaah an awm a, Aizawl FC nena an inkarah Lonestar Kashmir FC leh Mohammedan SC te an awm.

MPL2 champion Chanmari FC hi club naupang tê an la ni a; I League Second Division-a an vawi khat inlanna a ni a, an result hi a chhuanawm hle.