Kolkata leh Hyderabad chak hram

Inrinnia India Premier League inkhelah Kolkata Knight Riders-in Kings XI Punjab chu wicket khatin an hneh hram a, inkhel hnuhnung zawkah Sunrisers Hyderabad-in Delhi Daredevils chu run ruk in an hneh bawk.

Sunil Narine vanga chak Kolkata

Eden Gardens, Kol­kata-a inkhelah Punjab bat hmasa zawkah an ṭang a, over 20-ah run 183 vawchhuakin mi panga an hloh. Glenn Max­well chuan ball 22 a hmachhawnah run 43 vaw­chhuakin a khel chhe lo.

Kolkata tan Sunil Narine-a'n a vawmṭha a, over li-ah run 19 chiah pe in wicket li a la a, Kolkata chhandamtu a ni. Kolkata Knight Riders hian an target hi over 19.5-ah um pha in hnehna an chang a, ball 21 a hmachhawna run 51 vawchhuaktu Andre Russell-a'n a thawh­hlawk hle.

Chak thei lo Delhi

IPL-a sum inseng na­sa ber pawl Delhi Dare­devisl-in chak hmel an hmu hleithei lo a, Inrinni zana Hyderabad nen an inkhelh ṭumin Portuguese chhulchhuak Moises Henriques an ngam lo hle. Kum 28-a upa bats­man hian ball 46 a hma­chhawnah run 74 vawchhuakin dinhmun duhawm takah a team a hlangkai a, over 20-ah Hyderabad-in run 163 vawchhuakin mi pali chiah an hloh.

Delhi-in over 20-ah run 157 vawchhuakin mi pali an hloh a, ball 31 a hmachhawna run 50 vawchhuaktu Quinton de Kock leh ball 34 a run 63 vawchhuaka a tawp thleng dam Kedar Jadhav te'n khel ṭha thawkhat viau mah se run ruk chauha an target um pha lo in a tlawm zawkah an ṭan a ngai ta a ni.

Vawiin inkhel tur

Zanin dar 8:00 hian Rajiv Gandhi Inter­na­tional Stadium, Hyde­rabad-ah Sunrisers Hyderabad leh Kings XI Punjab te an inkhel ang.