PSG tan champion a hnai
Pathianni zan French Ligue 1 inkhel ah Lyon chu Caen lakah 3-0 a an chak loh avangin Paris St-Germain in champion nomawi an chawi thei teuh tawh hle.
Paris St-Germain hian an khingpui Guingamp chu 6-0 a an sawp avangin table a an hmahruaina an sawh nghet a, match hnih khelh hmabak la awmah point 6 a hma hruai fal tawhin champion turin point khat bak an mamawh tawh lo.
An hremna a zawh tawh avangin khelmualah Zlatan Ibrahimovic kan hmu leh tawh a, a thiam ala theih nghilh lo a ni tih lantirin Ibrahimovic hian goal hnih a khung bakah a ṭhiante goal thun tur vawikhat a siamsak bawk.
Inkhel ṭan aṭanga minute hnihna lekah Edinson Cavani chuan an hmahruaina goal a khung nghal a, Ibrahimovic chuan yard 10 aṭangin an goal hnihna a khung zui bawk. He mi hnu hian PSG an hawikir tawh lo, Cavani chuan goal hnih thun belhin hat-trick a siam bakah Ibra leh Maxwell te chuan goal khat ve ve an thun belh leh bawk.
Lyon tawlhthlu
An elpui ber PSG an chak tih hre lawk chungin Caen an hmachhawn a, chak ngei an mamawh tih pawh an hria. Mahse, an mamawh point an hlawhchhuak zo lo mai pawh niloin an khingpui Caen hian 3-0 in an lo sawp a ni. Caen tan attacking midfielder Nicolas Benezet chuan goal hnih a thun bakah striker Sloan Privat chuan goal khat a khung bawk.