Bengaluru-in hun ṭha bawhpelh

I League champion lai Bengaluru-in hma­hruaina hun ṭha an bawhpelh a, Zirtawpnia Shillong Lajong nen 1-1 a an inhnehtawk avangin hmahruaitu Mohun Ba­gan nen point 32 ve ve hmu­in pahnihnaah an awm.

Jawaharlal Nehru Stadium, Shillong-ah goal chance a awm lawk lo. Minute 33-naa CK Vineeth cross chu chance hmasa ber a ni a, Bengaluru forward Sean Rooney tauh chu inhliam TP Rehenesh aia lut keeper Kunzang Bhutia chuan a dang ṭha hle.

First half tawp hma hretah Eugeneson Lyng­doh-a freekick pet chu Rooney-a'n amah vengtu Khelemba Meitei lak aṭanga tal putin a tauh lut. Second half-ah Lajong an insiamrem a, tlar hmaah hrem vangin Cornell Glen chhawr thei lo mah se English defender John Johnson hand ball zarah penalty aṭangin Uillaims Silva-a'n an siphurh a sut.

East Bengal 3-0 a sawptu Bengaluru an che thei lo a, Zodingliana Ralte telna Lajong-in an nawr bet a, keeper Lalthuammawia Ralte zarah champion laiin point an hlawhchhuak hram.

Bengaluru-in an match thum khelh hma­bakah Salgaocar, Dempo leh Mo­hun Bagan te an la hmachhawn dawn a. Mohun Bagan-in Sporting de Goa ṭum hnih an tum dawn a, Royal Wahingdoh leh Bengaluru an la hma­chhawn bawk ang. I Lea­gue-ah match khelh tur tlem tawh mah se champion tur a la chiang lo.