Paul Pogba a dam ta

Thla hnih chhung a kaihza tha na vanga a inkhelh theih loh hnuah Juventus midfielder Paul Pogba a inkhel leh thei ta a, Inrinni zan Serie A inkhelah goal khat khungin a club Juve leh Cagliari chu sikhat ve ve thunin an inhneh tawk.

French midfielder hian yard 20 a hla aṭangin minute 45-ah goal hmahruai a khung a, he goal khat hi an chakpui mai dawna alan laiin Luca Rossettini chuan hun tawp hma minute nga la awmin an si phurh sutna goal a khung. An team boruak ṭhat lai taka an player pawimawh rawn kir leh ta hi Juve tan chuan chanchin lawmawm a ni ngei ang.

Juventus hian tun season-ah Serie A champion nomawi an chawi tawh bakah Cham­pion League final lut turin an dinhmun a ṭha tawh a, Nilaini hian Real Madrid chu an khelmualah an la luhchilh ang. Coppa Italia-ah pawh champion an la inbeisei a, June 7 khian Napoli nen final an khel bawk ang.

AC Milan an chak ve

A zawna match nga chhung zet hnehna an chan tawh loh hnuah Filippo Inzaghi naute'n chak hmel an hmu ve ta a, Inrinni zan khan Roma chu 2-1 in an hneh.

Milan tan hian Chel­sea aṭanga loan a an hawh mek Marco van Ginkel chuan Keisuke Honda cross ball ṭha tak chu goal-ah chantirin a team te hma a hruai pui. Second half-ah Mattia Destro chuan thum belh vein 2-0 in Milan-in hma an hruai. Franceso Totti penalty pet luh hmangin Roma-in beiseina nei ve mah se hun tawp thleng a goal an khung tawh loh avangin Milan hi 2-1 in an chak ta a ni.