Sawi hlawh Memphis Depay freekick
Memphis Depay-a'n season thara Manchester United a zawm dawn avangin ngaihven a hlawh a, media lamin uluk lehzuala an thlir lai takin kum 21-upa winger chuan PSV Eindhoven tana a home match hnuhnung berah yard 35 aṭangin freekick aṭangin a pet lut.
Pathianni inkhelah hian minute 32-naa Depay-a goal leh second half-a Jetro Willems te goal hamngin PSV-in Heracles Almelo 2-0 in an hneh. Eredivisie-ah season tawp nan match khat chiah khelh tur a awm tawh a, champion PSV leh pahnihna Ajax inthlauhna hi point 14 a ni.
Dutch winger Depay chuan, "Khawvel player ṭha zinga ka tel theih nan nitin freekick training ka nei ṭhin a, United ṭantute'n ka chunga beiseina an neih hi ka duh a ni. Ka inringtawk em em a, petna hun pe a nih chuan goal len chhungah ka khung ang," a ti.
A pet dan hmang sawi zuiin Depay chuan, "Player ṭha ball pet dan hi chu ka zir vek a, chung zingah chuan Ronaldo hi ka zir uluk bik. Anni nena khai khin theih ka ni lo a, an zinga tel ve thei turin training-naah theihtawp ka chhuah ang," tiin a sawi.
PSV ṭantute chuan Depay chunga lawmthu sawi nan Pathianni inkhelah hian banner 'Dreamchaser of Eindhoven' tih inziakna chu an phochhuak.
Depay freekick hi PSV tana a goal 50-na chiah a ni a, Dutch champion thar tan hian match 123-ah a inlan tawh a. Nipui transfer inhawn veleh Depay hian Manchester United a zawm ang.