CYMA FOOTBALL Armed Veng leh Venghlui ten quarter-final an lut

Nimin aṭang khan Lammualah C.T Group Cup Inter Branch YMA Football Tournament 2015 last 16 chu khelh chhunzawm zel a ni a, inkhel hmasa zawkah Venghlui chuan 4-2 a Tuivamit hnehin Quarter final lut hmasa ber an ni. Inkhel hnuhnung zawkah Armed Veng in Ramthar Veng chu 1-0 a hnehin quarter final an in pet tling ve bawk. Vawiin inkhel a chak pahnih Venghlui leh Armed Veng te hi Zirtawpni khian Quarter-final-ah an inhmachhawn ang.

Last 16 inkhel hmasa berah Venghlui-in an thiam zia an lantir a, an khingpui Tuivamit chu 4-2 in an hneh. Lalramhluna leh Lalmuanawma goal khat ve ve thun hmangin Venghlui hian first half-ah 2-0 in hma an hruai. Second half ṭan hnu lawkah Lalramliana goal leh minute 69 na a Lalramnghaka goal thun hmangin hmangin Tuivamit-in an chhang let a, minute 70-ah 2-2 a ni. Chak zawk tur rinthiam a har viau laiin Venghlui tan KC Larchhuakmawia leh KC Lalthangchama te chuan goal khat ve ve thun lehin 4-2 in Venghlui an chak.

Inkhel hnuhnung zawkah Ramthar Vengin an tlarhnung remphuiin Armed Veng tlarhmate dang bet rei viau mah se hun tawp dawna vawikhat an chetsual an tuar. Free-kick aṭanga ball lo kal chu Ramthar Veng defender ten an clear mai loh avangin Lalfakzual chuan hnai set sawt aṭangin chiang tak maiin a pet goal. Goal khat a luh hnu hian Armed Veng an hlauhawm chhunzawm a, striker Fakzuala chuan goal khungna hun ṭha nei leh mah se goal erawh an thun belh thei bik lo. Armed Vengin 1-0 in Ramthar Veng an hneh.

NIMIN INKHEL RESULTS

VENGHLUI 4 - 2 TUIVAMIT

VENGHLUI : Lalramhluna 24' ; Lalmuanawma 30' ; KC Larchhuakmawia 74' ; KC Lalthangchama 84'

TUIVAMIT : Lalramliana 48' ; Lalramnghaka 69'

ARMED VENG 1 - 0 RAMTHAR VENG

ARMED VENG : Lalfakzuala 88'

Champion tawh Dinthar leh

Lengpui an lo lang dawn e

Vawiinah tualchhung football ngainatute tan inkhel hmuhnawm en tur a awm dawn, inkhel hmasa berah Thingsulthliah Diakkawn leh Dinthar an inkhel anga, inkhel thawhhnihnaah Bethlehem Vengthlang leh Aizawl Venglai te inkhel in, a hnuhnung berah Leitan leh Lengpui an inkhel ang.

Inkhel hmasa zawk tur Thingsulthliah Diakkawn hian Republic Vengthlang leh 'W' Phaileng te an hneh hnuah Chite Veng 2-1 in an hneh leh theih avangin team chhia an ni lo tih a chiang. An khingpui tur Dinthar hian tualchhung football-ah chuan hnuhma an nei ṭha hle a, engtiklai mahin an chhe ngai lo. CYMA tournament-ah hian kum 1990 leh 2002 khan an lo champion tawh nghe nghe.

Kum 2002 CYMA Football-ah khan Bethlehem Vengthang hi final-ah an vanduai tawha, kuminah erawh an vanneih hun a thlen tawh an beisei, an inbuatsaihna a ṭhat avangin champion pawh an tum hle. Aizawl Venglai pawh hi team ṭha tak tia sawi tur ni lem lo mah se team chhia an ni ngai lo. Nursery Veng 6-2 a hneh hnuah Kulikawn an hneh leh theih bawk avangin Bethlehem Vengthang tan zuam sual awl tak tur an a ni thei.

Chawhnu dar 2:00-ah inkhel hnuhnungber a awm anga, Leitan leh Lengpui an inhmachhawn ang. Aizawl khawpui pawn aṭanga champion thei awmchhun Lengpui hi team hlauhawm an nih ang bawkin an khingpui tur Leitan pawh hian an ti mai mai lo a ni tih chu Dampui leh Sateek lakah an lantir tawh.