Liverpool Champions League beiseina a chuai

Stamford Bridge-ah season thara Champions League khelh tum Liverpool an lenglut a, champion chiang tawh Chelsea nen goal khat ve ve khungin an inhnehtawk.

Chelsea fan ṭhenkhatin inkhelh chhung zawngin Liverpool captain season thara LA Galaxy pan tur Steven Gerrard an au el a, mahse 'Captain Fantastic' tia an koh hi mipui auh zam chi a ni lo. John Terry-a'n Chelsea hmahruaina goal a khung hnu in Gerrard-a'n Liverpool si phurh sutna goal a khung a, goal dang an thun belh theih loh avangin Liverpool tan season thara Champions League an beiseina erawh a bo ta.

Stevie G a la chuai lo

Stamford Bridge-ah mual neitu in goal an khung hma a, minute nga na lekah Ces Fabregas-a ball cross chu John Terry-a'n ṭha takin a tauh lut a, Liverpool player an hawihai. An striker rinrawl Diego Costa tel lo a khel Chelsea goal bawh a na lo a, Glen Johnson leh Philippe Coutinho te'n Chelsea goal an rum ṭhaih ve nghal. Goal khungtu erawh kum 35-a upa Steven Gerrard a ni. Kar hmasa lawka QPR laka an chakna goal tauh lut tu hian a la tar lo tih tilangin Jordan Henderson a free kick chu an si phurh sut nan a lo tauh lut.

Second half-ah Liver­pool tho an hlauhawm chhun­­zawm a, hmuhnawm khawp­in Raheem Sterling leh Phi­lippe Coutinho te'n khel mah se a pawimawh ber goal an khung theih loh avangin draw result-ah an lungawi a ṭul ta a ni.

Inkhel chhehvel

Team pahnih inkhelah player naupang, beiseiawm tak tak hmuh tur an awm nual. Blues tan kum 19 leka upa midfielder Reuben Loftus-Cheek-a'n a Premier League game hmasa ber rawn khelin a khel ṭha thawkhat hle. Liver­pool-in kum 18 leka upa striker Jerome Sinclair chu second half-ah an tlan luh tir bawk.

Chelsea captain John Terry-a'n goal a khung chiah khan Premier League chanchina defender goal khung hnem ber a ni nghal. Goal 39 khung tawhtu Terry hian goal 38 khungtu Everton defender hlui David Unsworth chu a lehpel a ni.

Liverpool tan season thara Champions League beisei a bo tawh a, an chung chiaha awm Manchester United an phak lohna hi point ruk ni tawhin Champions League khel tur chuan an game hmabak pahniha United an tlawm ve ve bakah goal sawm chuanga Liverpool an chak a ngai dawn. Hei hi theih loh tluka ngaih a ni tawh.

Eng nge an sawi?

Liverpool manager Bren­dan Rodgers chuan inkhel ṭan aṭanga second 30 na leka Raheem Sterling laka 'foul' Fabregas chu sawiselin, "A khelh dan kha en ula, red card hmuh a phu a ni. Sterling laka hlauhawm taka a chet hnu pawhin ṭul loah a dive a, a foul em em reng bawk. A inkhel tluan thei kha a vannei hle a ni," a ti.

Chelsea manager Jose Mourinho chuan, "Kan khel ṭha thawkhat viau in ka hria. Kan champion tawh vang ringawtin kan inthlahdah lo. Kan theihtawp chhuahin kan inkhel a, kan tana pawimawh ber chu kan inkhelh apianga chak result neih zel hi a ni," tiin an champion tawh vanga an inthlahdah chuan loh thu a sawi.

Liverpool dah pawimawhtu Gerrard

Minute 79 naah Liverpool-in an captain Steven Gerrard an lachhuak a, Stamford Bridge-a Chelsea fan te'n kut benga ding chungin Liverpool Legend an zahna an lan tir a, Chelsea substitute bench-a ṭhu te leh Jose Mourinho te meuh pawhin kut beng chungin an zahna an lan tir.

Liverpool khawchhuak Gerrard chuan, "Ka tan chuan Liverpool fan te'n zahna min lantir tluka hlu a awm lo. Chelsea fan te hian an hnena ka kal duh loh vangin kum tam tak chhung chu min lo au el tawh ṭhin. A vawikhat nana min zahna an lan tir kha ka lawm em em a, ka tan a pawimawh ber erawh kum tam tak chhung ka lama lo ṭang tawh Liverpool fan te an ni," a ti.

Kum 2005 Champions Lea­gue-a ropui taka Liverpool champion puitu Steven Gerrard chuan amah atchilhtu Mourinho chungchang sawi kaiin, "Mourinho hi ka zah em em a, ka tan chuan khawvela manager ṭha ber a ni. Liverpool fan ni lo ila chu vawi thum lai a hnena khel tur hian hun ṭha ka nei a ni," tiin Mourinho-a'n vawi tam tak a lo sawm tawh thu a sawi.

Kum 34-a upa Gerrard chuan, "Mourinho zawm tum hian vawi tam tak ka rilru ka lo seng tawh. Mahse, a tawpah chuan a sawmna hnarin Liverpool-ah ka cham leh nge nge zel. Liverpool Football Club ka hmangaihzia hrechiangtu chu Mourinho hi a ni, ka tan chuan Liverpool mipui te tana hnehna chan ṭhin tluka hlu hi a awm tlat lo a ni" a ti.

Inter Milan, Real Madrid leh Chelsea a enkawl laia Gerrard lakluh tuma hlawhchham Jose Mourinho chuan, "Chelsea fan te'n ding chunga Stevie zahna an lantir avang khan ka lawm hle. Auh elna hla an sak pawh kha a theihtawp chhuaha inkhel ṭhin kan hmelma duhawm thlahna hla a ni. Anfield-ah chuan kar tin kum engemaw zat chhung Liverpool fan te'n amah zah na an lan tir ṭhin a, Stamford Bridge-a kut beng leh ding chunga lawm hlawh erawh thil thleng khat tak a ni," a ti.