La Liga Thlirletna Atl Madrid dam nan Torres a goal a tawk lo
Pathianni zan Spanish la Liga inkhelah champion lai Atletico Madrid leh Levante te chu 2-2 in an inhneh tawk. Point hmuloin Atletico an tlawm mai dawna a lan laiin Fernando Torres chuan an si phurh sutna goal a khung hram a ni.
An khelmual a khel an ni bawk a, Levante an khel chhe lo. Minute 32 naah David Barral chuan an hmahruaina goal a khung. Mahse, Atletico lam an duai bik lo goal an phurh aṭanga minute hnih hnu lekah Tiago cross ball ṭha tak mai chu Guillherme Siqueira chuan a ke veilam hmangin mawi takin Levante goal-ah a chhuih lut.
Second hlaf-ah pawn Levante lam bawkin goal an khung hmasa leh a, Kalu Uch hmangin minute 63-ah hma an hruai leh. Hun tawp nan minute 10 chauh a awm tawh tihin Koke corner pet chu Torres chuan an si phurh sutna goal a khung ve leh bawk. Inkhel tawp thlengin goal dang a lut tawh lo a point khat ve ve an insem.
Tun dinhmunah Levante hi relegation zone aṭangin point ngain an him rih a, point khat pawh an hmu leh thei a nih chuan kum tharah La Liga an khel chhunzawm ang. Atletico pawh in kum thara Champions League khel turin point thum bak an mamawh tawh lo.
Tun season-ah Diego Simeone a naute hi khel ṭha thawkhat viau mah se anni aia khel ṭha Barcelona leh Real Madrid an awm avangin an langsar lo hle. League match 36 khelh tawh aṭangin Atletico hian point 77 hmu tawhin table-ah pathumna an ni mek. Hmahruaitu Barca nen hian point 13 zetin an inthlau. Champion turin Barcelona hian vawikhat chak bak an mamawh tawh lo.
Atletico manager Simeone chuan, "Kan ruahman danin Mario Mandzukic khan first half a khel a, second half-ah Torres a lut thung. Kha kha kan ṭhat dan ber tur nia ka ngaih vang a ni. Kan khingpui te an ṭhata khelh an harsat em em hi chuan Torres te anga player ṭha hi kan mamawh ṭhin hle a, zanin pawh khan chu chu a chiang hle. Tun season-ah pathumna dinhmun hauh tur pawn nasa taka kan beih a ngai a, mahse tunah chuan thil engkim kan kutah a awm ta, season tharah Champions League kan khel ngei ang," tiin a sawi.
Inkhel Results
Levante 2 - 2 Atl Madrid
Villarreal 1 - 0 Elche
Almeria 1 - 2 Malaga
Celta de Vigo 1 - 1 Sevilla