Bangalore chak zanah de Villiers

Pathianni khan India Premier League-ah inkhel pahnih a awm a, inkhel hmasa zawkah Royal Challengers Bangalore-in run 39-a Mumbai Indians an hneh a, inkhel hnuhnung zawkah Chennai Super Kings-in Rajasthan chu run 12 in an hneh bawk.

Dan rual loh ABV

Wankhede Stadium, Mum­bai-ah mikhual team an tlangnel a, Bangalore-in anmah­ni mikhualtu Mumbai lakah ṭhat an chhuah duh lo. Bangalore hian over 20-ah run 235 an vawchhuak a, mi pakhat chiah an hloh.

Bangalore tan AB de Villiers a che ropui a, South Africa batsman hian ball 59 a hmachhawnah run 133 vaw­chhuakin a tawp thleng a dam a, a khel ropui hle. ABV hi captain Virat Kohli-a'n a thlawp ṭha hle bawk a, India batsman hian ball 50 a hmachhawnah run 82 a vawchhuak ve bawk a ni.

Mumbai Indians lamin theihtawp chhuahin an target hi an um a, ball 53 a hmachhawna run 68 vawchhuaktu Lendl Simmons leh ball 24-a run 49 vawchhuaktu Kieron Pollard te'n vaw ṭha thawkhat viau mah se Bangalore lam run siam a tam tham em a, over 20-ah run 196 vawchhuaka mi pasarih hlohin an chak zo ta chuang lo a ni.

An mualah Chennai chak hram

MA Chidambaram Stadium, Chennai-a inkhelah mual neitu Chennai Super Kings-in an mikhual team an hneh hram. Over 20-ah run 157 vawchhuakin mi panga an hloh a, New Zealand batsman Brendon McCullum chuan ball 61 a hmachhawnah run 81 vawchhuakin batsman dang khelh ṭhat loh zanah a team tan a dingchhuak.

Rajasthan lamin theihtawp chhuahin an target an um a, over 20-ah run 145 vawchhuaka mi pakua out in run 12 lekin chak lo zawkah an ṭang ta a ni.

Vawiin inkhel tur

Zanin dar 8:00 hian Delhi Daredevils leh Chennai Super Kings te an inkhel ang.