Walcott-a chunga rinna nghattu Arsene Wenger

Arsenal manager Arsene Wenger chuan a striker Theo Walcott chungah rinna a ngah ngam thu leh England forward chuan contract a pawh sei ngei a rin thu a sawi.

Walcott hian tuna Arsenal-a a contract-ah chuan kum khat chauh a nei tawh a, heivang hian an elpui Liverpool nen an sawizawm mek. Wallcott hi player ṭha tak ni mah se a vanduai a, a khup leh a ṭhal na vangin tun season leh season hmasa khan a inkhel tam lo hle. Tun hnai season hnih chhungin a club tan Premier League match 21 chiah a khel a ni.

Kum 26 a upa Walcott hian Arsenal tan match 297 khel tawhin goal 72 a khung tawh. A dam ṭhat lai pawnOlivier Giroud leh Danny Welbeck te an awm avangin hmun a chang ngai meuh lo.

French manager Wenger chuan, "Kum 26 aṭanga 32 inkar hi striker tan chuan an vanglai tak a ni ṭhin. Theo pawh hi chutiang hunah chuan a awm mek, chuvangin hetiang hun ṭhaah hian chhuahtir ka duh lo. Ani hi chuan goal thun hi a pianpui anih avangin a theihna hi ala tipung zel ang," tiin Walcott chelh a duh thu a sawi.

Walcott a chhuah dawn leh dawng loh an zawhna chhangin Wenger chuan, "Arsenal a contract nei lai a nia, he hmunah hian a awm ang chu. Tlar hmaah chuan alaiah leh a sirah a khel kawp thei a, a ṭul dan a zirin a insiamrem zung zung thei. He club hi a ngainain a hmangaih a, a chhuah ka ring lo," tiin a sawi.