Aguero hattrick-in QPR hnawtchhuak
Manchester City lakah Queens Park Rangers an ṭang ngam lo a, goal ruk lawih an chhuah avangin Premier League-a kum khat an cham hnuah season tharah Championship an khel leh ang.
Pathianni zan inkhelah City an hmuhnawm a, Sergio Aguero-a'n hattrick a siam bakah Aleksandar Kolarov, James Milner and David Silva te'n goal khat ṭheuh khungin mikhual QPR 6-0 in an sawp.
Etihad Stadium-ah City hian ball possession 60% an neih tlin bakah goal khung theihna chance vawi 22 an nei a, QPR-in goal tam zawk an chhuah loh hi a vannei hle.
Top Scorer tur Aguero
Argentine forward Aguero class san zia a lang nawn zel a, inhliam vanga kum tawpa thla khat chhung khel thei lo chungin tun season Premier League-ah goal a khung hnem ber.
Kum 26-a upa Aguero hian match hnuhnung pangaah goal riat a khung a, top scorer tura a elpui Diego Costa (19 Goals) leh Harry Kane (20) te'n season tawp hnaih meuh chuan an thlau ta hle. Aguero hian nikum khan goal 17 a khung a, top scorer Luis Suarez-a'n goal 31 a khung.
Freekick specialist
Great Britain hi David Beckham-a ke dinglam rawn larchhuahna a ni a, ball pet thiam hming thang Beckham khan Premier League-ah freekick aṭangin vawi 15 a khung a, record kawltu a ni mek. QPR lama freekick aṭanga khungtu Aleksandar Kolarov khan direct freekick aṭangin goal li a khung tawh a, Beckham record nen la inthlau deuh mah se City-ah Yaya Toure nen an khung hnem ber.
Pellegrini thukhawchang
City manager boss Manuel Pellegrini chuan, "Aguero inkhelh ka hmuh a, hma a sawn tih ka hriat khan ka hlim a ni. Kum khat liamtaa Aguero kha a ni tawh lo. Kum 26 chauha upa a ni a, hmasawnna tur tam tak a la nei. Club tan player pawimawh a ni nachungin tun ai hian a la pawimawh thei a ni," tiin hattrick siamtu Aguero chungchang a sawi.
Tlak phu QPR
QPR midfielder hlui Jermaine Jenas chuan, "QPR tana ka khelh lai khan Premier League anga cheibawl a ni ngai lo. Team khan pawisa ringawt an ngaihtuah a, inenkawl an fel fai lo a, an thlir thui lo a, inthununna a awm lo bawk," tiin a club hlui chungchang a sawi.
English midfielder kum 32-a upa Jenas thusawi hian awmze thui tak a nei a, QPR buaina hi field chhung piah lam a ni. Manager hna aṭanga Harry Redknapp a ban hma khan buaina hi a in ṭan daih tawh. Nikum khan Championship aṭangin Premier League-ah financial fair play rules bawhchhe chungin an inhlangkai a, an pawisa chawi tur pound maktaduai 58 an pek tlak theih loh chuan Championship an khelh a rem lo thei bawk.
Thil danglam ve tak chu QPR keeper Rob Green hi Premier League aṭanga ṭum li a tlak a ni a. QPR ṭum hnih a tlak puina a ni a, West Ham leh Norwich vawi khat ve ve a tlak pui tawh bawk.
QPR midfielder Joey Barton chuan, "Kan supporter rim taka an thawhchhuah hmanga season tluana min ṭantute chungah ngaihdam kan dil e. Sawi hreawm tak ni mah se league table hi a daw ngai lo a ni," tiin tlak an phu thu a sawi.
February 13-a QPR thuchhuakin season tawp thlenga Chris Ramsey chu coach atana an hmang tur thu an puang a, English manager hian match 11-ah vawi khat chauh chak pui mah se season thar a enkawl zel a duhthu a sawi.
Season thara QPR manager tur a la chiang lo a, sawi rik zingah Brentford manager Mark Warburton leh Real Madrid assistant coach Paul Clement te an tel.
Tunge tla leh dawn?
Burnley leh QPR te an relegate tawh a, Aston Villa (38 Pts), Leicester City (37 Pts), Sunderland (36 Pts), Newcastle United (36 Pts) leh Hull City (34 Pts) te zing aṭangin pakhat chu an tla leh ang. 18-naa awm mek Hull-in an match hma bakah Tottenham Hotspurs leh Manchester United an la hmachhawn dawn avangin season thara Premier League khel zel turin an dinhmun a chhe hle.