Harsatna tinreng hnuaia leng Adebayor
Tottenham Hotspurs striker Emmanuel Adebayor chuan tunhnai khan a facebook page-ah a mimal harsatna chungchang tarlangin December thlaa Spurs-in chawlh an pek chhan chu a sawi fiah.
Kum 31-a upa Togo international chuan, "Chhungawk boruak ṭha lo hi chu inchhung lamah chinfel mai tur a ni tih pawh ka hria. Hun rei tak chhung chu heng thu zawng zawng te hi ka rilruah sawichhuak lo in ka vawng reng a, vawiinah chuan chhungkaw tin ten in zir na atan an lo hman theih nan sawichhuah hi ṭul ta zawkin ka hria a ni," a ti.
Lawmna chang hre lo Adebayor-a chhungte
Tun season-a vawi 17 inlana goal hnih chiah la khung Adebayor chuan a chhungte chu engtik lai pawha amah tibuaitu leh lawmna reng reng nei lo niin a sawi a, an chhungkaw inkara buaina chuan a inkhelah a tihbuai vanga chawlh chu la a nih thu a sawi.
Arsenal striker hlui Adebayor chuan, "Footballer ka nih anga hlawh ka lak hmasak ber chuan kum 17 chauh ka ni a, ka hlawhchhuah hmasak ber hian ka chhungte tan in ṭha tak ka sak sak a, kum 2008-a African Footballer of the Year a thlan ka nih pawh khan lawmthu sawi nan stage-ah ka nu ka hruai chho tih in hmu ang. Khami kum vek khan London khawpuiah inenkawlna ṭha zawk a neih theih nan ka hruai a, fanu ka neih khan ka hlim em vangin ka nu chu ka phone a, mahse kan inbiak laiin phone chu a dah hmak a, ka fanu neih chungchang hriat chu a duh lo. Sum a lakluh ve na tur tiin dawr ka siamsak a, an inhralh
ṭhat theih nan ka thlalak leh hming an hman ka phalsak bawk a, hei lo liam hi fapa in a nu tan engnge tihsak theih a neih chuan?" tiin a theihna zawng zawng a hlan chung pawn a nu chuan a chungah lawmna reng a neih loh thu a sawi.
Adebayor-a neih
chentu a unaute
Manchester City tan pawha lo khel tawh Adebayor chuan kum hnih liamtaa East Lagon (Ghana)-a dollar maktaduai 1.2 senga a in leiah a unaunu leh a nu fa bik chu a chen tir thu sawiin, a unaunu Yabo Adebayor chuan in aṭanga an unaupa chu a lo hnawhchhuah thu leh in chu amah rawn hmasa lo a midang a lo luah tir daih thu a sawi!
Adebayor chuan, "Ka unaunu chu engvanga ka in chu midang lo luah tir ngawt nge a ni? tih ka zawh chuan ṭawngkam chhe tinrengin minute 30 chhung zet min lo ankhum a, sawifiah tura ka nu ka biakin ka unaunu ang thoin min lo ankhum hrep a ni," tiin a unaunu chuan lawmna reng nei lo anga a puh let thu a sawi.
Real Madrid a khelh laia amah hekna thehluttu a unaupa Kola Adebayor chungchang sawiin Adebayor chuan, "Germany-a kum 25 a khawsak chhungin a veivahna man ka tumsak ziah a, a fate lehkha zir nana sum sen ngai zawng zawng ka sen vek a ni bawk. Sumdawnna liantham tak ṭana duh thu min hrilh in sum tam tham tak ka pe a, mahse vawiinah hian a sumdawnna hmuh tur a awm lo," tiin a unaupa chu a neih chen tu a nih thu a sawi.
Adebayor chuan an unaupa Peter-a thih ṭumin Kola chu an unaupa vuinaa a tel theih nan sum tam tak a thawn thu leh a rawn lan tak chuan loh thu sawiin 'The Sun' chanchinbu lakah dawt sawiin sum tam tak hlawh duh vang maia a tih mualpho thu a sawi bawk.
Kum 31-a upa Adebayor chuan a unaupa Rotimi chu football academy-ah a dah thu leh player 27 zinga phone 21 a ruk vanga an hnawhchhuah thu sawiin a unau te laka a beidawn takzet thu a sawi.
'Ka nu, i dawn tawi lua!'
Adebayor chuan French Ligue 1 club Metz tan a khelh laiin thla khatah €15,000 (Rs. 10,70345) a hlawh thu sawiin, "Ka dinhmun min hruai thlengtu ka nu laka lawmthu sawi nan ka thla thum hlawh khawlin €45,000 (Rs. 32,11035) man ṭhi man to tak ka leisak a, mahse ka unaupa Rotimi leh a ṭhian te'n lo ru in €800 (Rs. 57,085)in an hralh a, ka nu in a naupang zawk anih vanga ngaihdam tura min tih vang chauhin ka ngaidam a ni," tiin a rilru nat thu a sawi.
Arsenal tan match 104 a khelha goal 46 khung theitu Adebayor chuan, "Ka unaupa Peter-a a damloh khan hmanhmawh takin Togo ka pan a, mahse ka nu chuan aman engkim alo buaipui tur thu leh chumi atan sum tam tham tak a mamawh thu min hrilh a, a hnu lawkah Peter chu boralin ka unaupa damna tura engmah ti lo angin ka chhungte chuan min puh leh si," tiin a sum pek zat tam zia chu Pathian chauhin a hriat thu a sawi.
MidanGte Ṭanpui thei lotu
2008 African Footballer of the Year Adebayor chuan, "Ka chhungte vang hian Africa-a mi harsate ṭanpuina tura ka ruahman pawl pawh ka din thei lo. Din tura hma ka lak apiangin miin 'i chhungte pawh i ṭanpui thei lo ania' tiin min chhuah chhal ṭhin a, a nuam lo takzet. Pathian chauhin eng anga sum tamin nge ka ṭanpui tih a hria a ni. Ka chhungte tih mualpho hrim hrim hi ka tum a ni lo a, mi tam takin in zir nan an hman theih nan kan chhungkaw boruak hi puang darh ka ni," tiin a thu puanchhuah chhan a sawi.