New York Derby-ah Red Bulls

Pathianni khan Major League Soccer-ah New York Derby hmasa ber khelh a ni a, Bradley Wright-Phillips goal hnih hmangin New York Red Bulls-in club thar New York City 2-1 in an hneh.

Wright Phillips hi Arsenal legend Ian Wright-a fapa a ni a, Eng­land leh QPR winger Shaun Wright-Phillips nau a ni. Wright Phillips hian Manchester City youth-ah bul a ṭan a, City tana season hnih a khelh hnuah Southampton-ah lut lehin Red Bulls a zawm hma hian Plymouth Argyle, Charlton Athletic leh Brentford-ah te a khel bawk.

NBA Playoff : Thawhṭanni zing khan Eastern Conference semifinal-ah Cleveland Cavaliers-in buzzer rik ruala Lebron James-a score hmangin Chicago Bulls 86-84 in an hneh a, series-ah 2-2 an inhnehtawk chiah. Game 5 hi Quicken Loans Arena, Cleveland-ah Nilaini zing dar 4:30-ah an khel ang.
Eastern Conference semifinal dangah Los Angeles Clippers-in Houston Rockets 128-95 in an hneh a, Clippers hian 3-1 in hma an hruai mek. Nilaini zing dar 7:00 khian Toyota Center, Houston-ah Game 5 an khel leh ang.
Vawiin hian Western Conference semifinal khelh a ni dawn. Atlanta Hawks leh Washington Wizards te tukin zing 4:30 hian Verizon Center, Washington-ah an inkhel dawn a, Wizards hi 2-1 in hma an hruai mek. Zing dar 7:00-ah Golden State Warriors leh Memphis Grizzlies te an inkhel dawn bawk a, Grizzlies hi 2-1 in hma an hruai mek bawk.