Champions League Thlirlawkna Barca dan tur German ral lian

2014 FIFA World Cup-ah Lionel Messi captain-na hnuaia khel Argentina-in German ral lian an dawl zo lo a, Mario Gotze goal hmangin Germany an champion. Club inelna zinga dah san ber Champions League-ah Messi-a'n a ropuina a lan tir a, Germany champion ṭuma player pawimawh awm khawmna Bayern Munich lama goal hnih a khung zarah Barcelona chu final lut turin an dinhmun a ṭha tawh hle. Zanin dar 12:15 hian Allianz Arena-ah semifinal thawh hnihna khelh a ni dawn.

Nou Camp-ah Catalan club-in Messi goal hnih leh Neymar goal hmangin Bayern Munich 3-0 in an hneh a, Pep Guardiola hian a club hlui Barcelona hi extra time hruai thleng tur pawhin goal chhuah loh bakah goal thum tal khung a ngai. Spanish champion ni mai tura ngaih Barcelona final kalkawng hi dal theih tawh loh ang hiala ngaih theih a ni.

Guardiola a ni tlat

Pep Guardiola hian Barcelona a enkawl aṭang tawhin khualmualah record ṭha chungchuang a nei bik lo. 2008-09 season khan knockout stage chinah khualmualah chak an nei lo a, match khata goal khat khung ang zel an ni. Nou Camp leh final (neutral ground)-ah erawh an khingpuite lamah goal 12 khungin goal hnih chiah an chhuah.

2009-10 season-ah a danglam lo. Groupstage-ah Dynamo Kiev an hneh tih loh chu chak an nei lo a, vawi li an chak lo a, vawi khat chauh an draw. Amaherawhchu Nou Camp-a result ṭha an neih zarah semifinal an thleng tho a, semifinal-ah Inter Milan lakah 3-1 in Italy-ah an tlawm a, Spain-ah 1-0 chauha an chak avangin final an thleng zo ta lo.

2010-11 season-ah khualmual result a ṭha hret a, group stage-ah Rubin Kazan leh Copenhagen te away-ah an draw a, Round of 16-ah Arsenal 2-1 in Emirates Stadium-ah an hneh lo a; amaherawhchu Shakthar leh Real Madrid te khualmualah hnehin an champion zui bawk.

2011-12 season-ah groupstage-ah hneh loh an tawng lo a, knockout-ah erawh khualmualah harsatna an tawk leh a. Quarterfinal-ah AC Milan nena Italy-a an inkhelh ṭumin goal an khung thei lo a, Nou Camp-ah erawh harsatna nei loin 3-1 in a chak thung. Amaherawhchu semifinal-ah Chelsea lakah 1-0 in London-ah tlawm a, Nou Camp-ah chak mah se away goal rule-in an tla ta tho.

Season khat a awl hnuah Guardiola-a'n 2013-14 season aṭangin Bayern Munich a enkawl a, group stage-ah vawi khat chiah an tlawm a, an chak lohna hi an mual a ni. Round of 16-ah Arsenal 2-0 in Emirates Stadium-ah an hneh a, 1-1 in Allianz Arena-ah an draw thung. Quarterfinal-ah Manchester United nen Old Trafford-ah an inhnehtawk a, an mualah 3-1 in an chak leh a. Semifinal-ah Real Madrid 1-0 in Santiago Bernabeu-ah an hneh lo a, Allianz Arena-ah 4-0 in an tlawm.

Nou Camp angin Guardiola hian Allianz Arena hi a hmang thiam lo tih dawn chuan tun season-a an record hi thlir ila ngaihdan kan thlak thei ang.

Round of 16-ah Bayern-in Shakhtar Donetsk lakah Lviv, Ukraine-ah goal an khung lo a, 0-0 in an inhnehtawk. Allianz Arena-ah goal sarih kan hmu a, Bayern khung vek a ni.

Quarterfinal-ah Bayern-in khualmualah result ṭha an nei chuang lo a, FC Porto lakah 1-3 lawihin an tlawm a; Allianz Arena-ah 6-1 in Bayern an chak a, inlehthalna ropui an lantir. Tun season Champions League-ah Bayern-in goal 30 an khung tawh a, an player pasarihin goal hnih emaw a aia tam an khung tawh a, goal khung thei player an ngah tihna a ni.

Tun ṭumah hian Barca hi an lehthal leh thei a nih chuan ṭum 10 nan Champions League final an lut ang. Amaherawhchu final lut turin inlehthalna ropui an lantir tawh aia ropui an phochhuah a ngai tawh ang. Player pawimawh Franck Ribery, Arjen Robben, David Alaba, Holger Badstuber, Sebastian Rode leh Tom Starke te khel thei lo tur hian harsatna a belhchhah bawk ang.

Messi an nei

Barcelona hian Champions League-a goal khung hnem ber Messi (goal 77) an nei a, inelna hrang hranga Argentina captain record hi ngaihnawm tham a tling. Tunah chuan Messi chauh a ni lo a, Luis Suarez leh Neymar hi ven tham an ni a, South American trio hian tun season inelna hrang hrangah goal 113 an khung tawh.

Luis Enrique hote hian an tlar hnung lam aia an tlar hma an chhuan zawk avangin ball chang tam chunga attacking game awmze nei an khelh a rinawm a, team ṭha intum ni chung siin Bayern-in goal an khung hma loh chuan inkhel ho lam takah a chhuak ve thei bawk.