F1 Spain-ah Mercedes driver te an chungnung

Tun season Formula one intlansiakah Merce­des an che ṭha fal a, a bikin British driver Lewis Hamilton a che ṭha hle. Kartawp Spanish Grand Prix-ah pawh Mercedes bawk an che ṭha leh a, Nico Rosberg chu pakhatna niin a team-mate Hamilton chu pahnihna a ni leh bawk.

Kumina a vawikhatna atan Rosberg hian pole position aṭangin intlan­siak bul a ṭan a, kumina a vawikhatna atan vek Hamilton chuan pole posi­tion chang lo in pa­hnihna aṭangin intlansiak bul a ṭan thung. Sebastian Vettel chuan Mercedes driver pahnihte hnung chiah aṭangin bul a ṭan bawk.

Hum ṭha a chan ang ngeiin Mercedes driver Rosberg-a'n intlansiak bul ṭan aṭanga a tawp thlengin hma a hruai thei a, bul ṭan fuh lo deuh Hamilton chu a tir lamah Vettel-a'n tlan pel mah se a tawpah erawh Hamilton bawk a dingchang leh ta zawk a ni.

McLaren team an che fuh thei lo chhunzawm zel a, Fernando Alonso chu brake failed vangin a tlan tluan theih loh bakah Jenson Button chu 16 naah a thleng pha hram.

Spain a pakhatna Rosberg chuan, "Kar tawp duhthusam a ni e, kan team leh ka car pawh duh­thusamin kan ṭha e. Kuminah uiawm takin pakhatna ka ni lo ṭhin a, tunah erawh ka hun a thleng ve ta hi ka lawm hle," tiin a sawi.

Hamilton chuan, "Intlansiak bul ka ṭan fuh lo a, ka motor ke thlan kha a fuh dawn loin ka hre hman. Mah se a sual tam lo e. Nico kha a tlan ṭha takzet a, qualifying lamah pawh a che ṭha ber a nih avangin pakhatna nih kha a phu a ni," tiin a sawi.

Spanish Grand Prix a pakhatna anih avang hian Rosberg hian Hamilton nena an inkar chu point 20 in a ti tlem sawt a, Vettel leh hmahruaitu Hamilton-a inthlauhna erawh point 31 ala ni thung.