Mizoram sorkarin Denic-a a lawmpui

Minister of State, Sports & Youth Services Lalnghinglova Hmar chuan nimin khan a office-ah Asian Arm Wrestling International Cup-a medal late lawmpuina hun a hmang a, sorkar chuan Mizo arm wrestler-te tan an hnathawh awm tawk a buaipui thu a sawi.

October 26-a neih zawh tak Asian Arm Wrestling International Cup-ah khan Denic Lalruattluanga chuan 80kg Senior Men (ding lam inelh) ah gold medal a la a, Asia khawmualpuia ban elhchak ber dinhmun a luah.

ITI Veng tlangval Denic-a bakah hian 100kg Senior Men-ah Benjamin Lalawmpuia chuan silver medal lain, Vanramnghaki chuan 80kg Senior women inelnaah, ding leh vei lam inelhah silver medal ve ve lain, para Women-ah bronze a la bawk.

Lalnghinglova Hmar chuan, "Mizote kan inlawmpui dan ka hmuhin lawmawm ka ti a, social media lam thlenga kan infiammite kan chawimawi dan hi hlu ka ti," a ti a, Mizo mipuiten infiammite thawhrimna an hmuhsak chu lawmawm a tih thu a sawi.

Nimina Sports Minister-in Mizo ban elh chak pathumte a chawimawinaah hian sorkar thuneitute bakah Mizoram Arm Wrestling Association hruaitu te leh Pro Panja League neitu Parvin Dabas leh People’s Armwrestling Federation of India president Preeti Jhangiani te pawh an tel.