Sports Incentive Cash Award dawng tur Denic

Mizoram sorkar hian infiammite tana Sports Incentive Cash Award kalpui mek chu an thlak danglam dawn bawk a, Tetea Hmar chuan he kalphung tharah hian Denic Lalruattluanga leh a ṭhiante tan pawh Sports Incentive Cash Award dawn theih a nih tur thu a sawi.

Sports Minister chuan, "Kan sorkar hmain infiammi tam zawkin Sports Incentive Cash Award an dawn ve theih dan tur kan buaipui tur thu kan sawi a, hei hi a takin kan bawhzui. Olympic huanga infiamna chauh ni loin, Olympic sports discipline ni lote pawhin he award hi an dawng ve thei tawh dawn a ni," a ti.

Tun hmain Sports Incentive Cash Award hi Olympic huanga infiamnaa telh ṭhin infiamnate chauhin an dawng ṭhin a, hei hi tunah thlak danglam niin, Mizoram State Sports Council hnuaia association 33-a infiammite chuan an dawng ve thei tawh dawn a ni.

Tetea Hmar chuan, "Olympic-ah infiamna nghet a awm bik lo a, kum li danah Olympic huanga infiamna telh ṭhinte hi tihdanglam a ni ṭhin. Kuminah pawh 'Breakdancing' te kan hmu nawlh mai a ni - Olympic sports discipline nghet a awm theih loh a, MSSC hnuaia association 33-ten he award hi hlawhtlinna an chan phawt chuan dawn ve zel hi an phu a ni," a ti.

He hunah hian MAWA aiawhin Secretary Phillip Lalbiakchama chuan report pein, "Olympic infiamna huanga mi ni loin incentive kan dawn theih loh kha, tunah chuan kan dawng thei tawh dawn a, kan lawm hle," tiin a sawi.