Mizoramah Pro Panja Mega Match nei dawn!

Nimina Denic Lalruattluanga, Benjamin Lalawmpuia leh Vanramnghaki te hlawhtlinna lawmpuina hunah hian, sports minister Lalnghinglova Hmar, Pro Panja League dintu Parvin Dabas leh People’s Armwrestling Federation of India president Preeti Jhangiani te chuan December-ah arm wrestling tournament Pro Panja Mega Match chu Aizawlah neih a nih tur thu an puang.

Ruahman dan chuan inelna hi December thla chawhnu lam, Krismas ruai ṭheh zawh tawh lamah neih tum a ni a, international arm wrestler ṭha tak tak an lo kal dawn - Denic Lalruattluanga pawh a inlan dawn a, ani hi main event-ah inlanin, a hmachhawn tur arm wrestler ṭha an chah chhuah tur thu Parvin Dabas chuan a sawi.

Parvin Dabas chuan, "Tunah hian arm wrestling league Pro Panja League kan kalpui mek a, khawvel hmun hrang hrang aṭangin arm wrestler ṭha an lo kal ṭhin. Sony nen thawk dunin, annin live-in min pekchhuahsak ṭhin a, nikum khan mi maktaduai 32-in an en a ni," a ti a, entu an beisei phak baka an ngah thu a sawi.

Bollywood actress lar ni ṭhin, tuna PAFI president Preeti Jhangiani chuan, "Mumbai khawpuiah Mizo tlangval vangin, stadium-ah fans tam tak chu lawmin, 'India tan hnehna a ni' tiin an au a ni," a ti a, Denic-a hlawhtlinna a ropui thu a sawi.