Mizoram Football Association-in football hmel tibaltu club, official leh player a hrem

Mizoram Football Association chuan November 4, Thawhṭanni khan thuchhuah an siam a; football hmel tibaltu club leh official pathum ve ve bakah player 25 an hrem thu an ti chhuak.

MFA-in an hrem chhan hi AIFF Disciplinary Code 2024 'Article 63.2' an bawhchhiat vang a ni a. An hremte hi MPL club pathum Sihphir Venghlun FC, FC Bethlehem leh Ramhlun Athletic FC an ni a, kum thum chhung football-a inhnamhnawih thei lo tura hrem an ni.

Hremna hi Mizoram chhung atan a ni a, chutihrualin MFA-in India rama thuneitu sang ber AIFF hnenah thil thlen dan hriattirin India ram chhung atana hremna lekkawh a nih theih nan hma an la.

Hremna tuartute hian hremna thuchhuah aṭanga ni 10 chhung an khinglet thei a; November 14, thleng an khinglet thei dawn tihna a ni.

Hrem te chu

Club official pathum Robert Laldinthara (Sihphir Venghlun), Danny Lalduhawma (Ramhlun Athletic) leh Johny Ramthansanga (FC Bethlehem) hrem an ni a; Robert hi kum nga chhung hrem niin midang pahnih hi kum thum chhung hrem an ni thung.

Player 25 hrem zingah Chanmari FC player Lalnunzama leh FC Bethlehem player L. Lotha te chu dam chhunga football kaihhnawiha inhnamhnawih thei lo tura hrem an ni a, player dang hremte hi kum nga, kum thum leh kum khatte an ni hlawm.

MFA honorary secretary Lalrengpuia chuan, "Tun ṭumah hian thil tisual zawng zawng kan hrem vek tihna a la ni lo a, hrem hmaih pawh kan nei ang. Hei hi a bul ṭanna a ni a, football hmel tibal thei lakah Mizoram football a fihlim theih nan hmalak zel kan tum. Hmalatu MFA Disciplinary Committee te an fakawm a, kawng engkimah kan thlawp zel ang," tiin Vanglaini a hrilh.

Hremna dan chu

Mizoram Football Association-in football dan hmangin a hnuaia player-te a hrem a, a hremna chu AIFF Disciplinary Code 2024 'Article 63.2' a ni.

Article 63.2-ah chuan, "Mi tupawh match official te emaw, player te emaw, official te emaw hnena, thamna pawisa emaw thil tiam, amah ngeiin emaw midang kaltlanga AIFF regulation bawhchhe zawnga hmalakna a neih chuan dan a bawhchhia a ni," tiin a inziak.

Hremna chu Rs 3,00,000/- aia tlem lo leh kum thum chhung aia tlem lo football leh a kaihnawih thil reng reng a tel ve leh eng stadium-ah pawh luh khap a ni.

MFA lam hian Mizo dinhmun thlirin hriatthiamna thui tak a nei a, tun ṭuma hremte hi pawisa chawi turin a titel lo a, hei bakah hian kum thum aia tlem hrem te a nei bawk.

MPL leh investor

MFA-in hlawhtling takin MPL kum 10 chuang a kalpui tawh a, a hlawhtlinna kawngah hian MFA leh Zonet bakah hian club enkawltute an pawimawh hle. Club enkawltute hian sum ṭhahnem tak an seng a, anni hi 'investor' chu an ni.

MPL ṭantirh lamah chuan investor-te hi Mizo zel a nih avangin buaina hriat tur a awm ngai lo a, inelna thianghlim tak chhawp chhuah a ni ṭhin.

MPL vangin Mizoram football a hming ṭha a, player-ten phai lamah club-te an hmuh phah a, hei vang tak hian state pawn aṭangin investor te an rawn lang ṭan. Chutihrualin phai lam investor-ah hian rintlak leh rintlak loh an awm thung.

MPL10 aṭangin Project Veng FC leh FC Venghnuai te an tla thla a, an aiawhin SYS FC leh FC Behlehem te MPL11 khel turin an inpettling. Chutihrualin Chhinga Veng leh Electric Veng ten MPL an khelh zui zel theih tak loh avangin Ramhlun Athletic leh Sihphir Venghlun te an rawn lang bawk.

Club thar pali an awm a, SYS FC hi chu SYS Football Academy behchhan an ni. Club dang pathum FC Bethlehem, Ramhlun Athletic leh Sihphir Venghlun te innghahna chu phai lam 'investor' an ni a, hming mumal an nei lo. Heng investor te hian Chawnpui FC pawh an be fel bawk a, phai lam investor hnuaia awm club pali an awm tihna a ni.

MFA a hlauthawng

MPL11 ṭantirh aṭangin MFA-in thil dik tawk lo awmah a ngai a, uluk lehzualin MPL a thli thlai reng. Hemi avang hian tun season aṭangin MFA Integrity Officer atan C. Lalmalsawma, MPS chu an ruat thar.

August 23, Zirtawpni zan khan Mizoram Football Association chuan MPL Club-te leh match official-te tan a vawi khatna atan Chanmari YMA Hall-ah Integrity Workshop a buatsaih.

Integrity Workshop neih zawh hnu hian Chawnpui FC chuan an thawhpui investor te nena an thawhdunna an chhu chat a, tun ṭuma hremna pawh hi an pumpelhah a ngaih theih.

MFA integrity officer

C. Lalmalsawma chuan, "Dan hi kan hriat a ṭul khawp a, hemi kawngah hian awareness kan pek zel hi a ngai. Dan hriat loh hi hremna pumpelh nan chhuanlam a tling lo a. MFA lam pawh hemi kawngah hian ṭan kan lak zel a pawimawh a ni. MFA-in dan hmanga huai taka hma a la hi a fakawm ka ti a, Mizoram football hmasawnna leh tihzahawm zelna atan mellung pawimawh tak a nih ngei ka ring," tiin Vanglaini a hrilh.

Thil thlen dan chu

Tun ṭuma thil thleng hi 'match fixing' tih tur chu a ni chiah lo a, MPL11-ah hian inkhel result tidanglam dawrh hriat a ni chiah lo. Cricket lama hriat lar 'spot fixing' te a ang mah zawk a, 'side betting' tihte pawhin a sawi theih ang.

Investor hian an hnuaiah player an nei a, club nena inremna an neih rualin an player-te hi an ziak lut tel. Investor tan an player-te hi an kut leh ke ber tiin a sawi theih.

Inkhelh laiin player-te hmuh theih turin signal petu an awm a, an signal pek dan a zirin player-te hian hma an lo la ṭhin. Tum reng vanga penalty chawi te, goal chhuah te leh thil dangte a thlenga ngaih a ni.

Official leh player-te hrem an nih chhan hi an hriat puia ngaih an nih vang a ni thei a, an inrawlh dan pawh a inang vek lo a, hei vang tak hian an hrem dan pawh a hrangah a ngaih theih a ni.

------------------

Mizoram football hmangaih vangin hei leh chen kan inseng so a, min tilawmtu ṭhahnem tak kara chanchin duhawm loh hriat tur a awm ta mai hian kan rilru a ti na takzet a ni. MPL chungchanga Zonet leh MFA thawh dunna hi kum 11-na a lo ni tawh a, mi ṭhenkhatin dik lo taka hlawkna lak an tum hi hriathiam har kan tiin pawi kan ti takzet.
- LV Lalthantluanga, Zonet Director

Mizoram FA-in MPL-a match fixing-a inhnamhnawih club, official leh player hrem chungchangah thutlukna huaisen an siam. Football hi misualin an tihchhiat mai mai atan chuan a hlu mah mah. Hetang ṭang hian zir tur a chiang, investor lakah fimkhur a ang che.
- Marcus Mergulhao, Sports Editor, The Times of India (Goa)

Engtikah nge state dang football association hi an harhchhuah ang a, thutlukna an lak ve ngam dawn. Mizoram Football Association hma la hmasa tu in ni leh ta, inche ṭha e.
- Pradhyum Reddy, Dempo CEO

Mizo football tan chuan a lungchhiat thlak a, MFA Disciplinary Committee ten an hmu chhuak hi a lawmawm. Chutihrualin kan player ho hma lam hun chu, eng emaw chenah rin an hlawh loh phah ang tih a hlauhawm hle a ni.
- Hmingthansanga, Aizawl FC Sporting Director

Hei hian rilru a va ti na ve aw. Football hmel a ti bal hle mai. MFA lamin an hmu chhuak hma chu a lawmawm hle mai.
- Lalbiaksanga Colney, Mizoram Police coach

Rilru na taka ka sawi ziah kha. MFA te inva ti ṭha em. Mizoram tan hian a pawi lutuk, hei hi kan kaltlangpui loh chuan tun aṭanga kum 3-5 kan ram tana pawi turzia hi ka lo ngaihtuah ve ṭhin. Thil pawi tak a thleng mek a, hma kan la ve thei hi ka lawm hle mai.
- Lalrindika Hmar, Chawnpui FC coach

Sports-in a ken tel thil duhawm lo takin min luhchilh ve mek a. A hun taka kan hmeh mih a va ṭul em.
- Victor Lalbiakmawia, Aizawl FC Coach