Arsenal sporting director Edu a bang!

Edu chuan Arsenal sporting director a nihna a bansan a, a hna a kalsan mai chu thutlukna siam harsa leh hrehawm tak a nih thu a sawi chhuak a, midang a nghawng dawn em tih erawh hriat a la ni lo.

Brazilian mi Edu hian player a nih laiin kum 2001 aṭanga 2005 chhung khan Arsenal tan a lo khel tawh - Premier League nomawi pahnih chawiin 2003-04 season khan 'Invincibles' zingah a tel.

Inkhelh a chawlhsan a, kum 2019 khan North London club-ah bawk hian a kir a, player ni loin Technical Director a ni thung a, kum 2022 November aṭang khan Sporting Director a ni thung.

Kum 46 mi Edu chuan, "Arsenal chhuahsan tura thutlukna siam chu thil harsa tak a ni a, ka thinlungah he club hian hmun pawimawh a chang kumkhua tawh dawn a ni.

"Tunah chuan hringnuna chona dang hmachhawn a lo hun leh ta a, Arsenal hi hma lam pana hmasawn zel turin duhsakna ka hlan - mi ṭha leh fel tak takte nena kan hun hman hi ka tan chuan a hlu takzet," a ti.

Arsene Wenger chhuah hnuah Arsenal hian indinthar leh tumin theihtawp an chhuah a, an duh ang thlapin la kal thei lo mah se kawng dik an zawk mek niah an inngai, tuna an manager Mikel Arteta an lakluh theih nan pawh Edu-a hi mi ṭangkai a ni bawk.

Edu kaihhruaina hnuaiah hian player an la lut nual a, chung zingah chuan tuna captain Martin Odegaard, Ben White, Gabriel, Gabriel Jesus leh Declan Rice te pawh an tel. An match hnuhnung bera inkhel bul ṭantu zawng zawng kha Edu awm hnua an neih vek an ni.

Arsenal neitu Josh Kroenke chuan, "Edu-a thutlukna hi kan zahsak a, a kal zelna turah pawh duhsakna kan hlan. Club chhungah chuan inennawn leh inthlak danglamna a thleng ve ṭhin a, hei chu kalphung pangngai zinga mi a ni.

"Champion tumin theihtawp kan chhuah reng a, chumi kan tihhlawhtlin theih nan chuan hmalam kan pan zel ang," a ti a, tuna an team neih lai chu ṭha lehzual zawka siam an tum tih a sawi bawk.

Gunners hian beisei angin Premier League season bul an ṭan lo a, an chungah Manchester City leh Liverpool an awm mek - zanin dar 1:30 hian Champions League khel turin Inter Milan an lenchilh zui leh nghal dawn.

Arteta naute tan San Siro-ah fimkhur a ngai dawn, Inter Milan hi Serie A champion lai niin UCL lamah pawh sulhnu an nei chhe lo - Italian club lakah Gunners tan tlarhnung rem uluk a ngai dawn hle a ni.

Inter Milan chauh ngaihtuah theih a ni lo bawk, tun kar tawpah Arsenal hian Premier League khel turin Chelsea an len chilh zui leh dawn bawk - inkhel hautak tak pahnih a ni dawn a, player siksawi thiam a pawimawh bawk ang.