Mohun Bagan leh Etihad Airways thawk dun dawn?

Premier League ṭantirh aṭangin Manchester United-in ro an rel a, Blackburn Rovers leh Arsenal te an lang ve zawk bawk. Russian pa hausa Roman Abramovich lan hnuah Chelsea chu club ṭha zingah chhiar tel an ni. Kum 2008-ah Abu Dhabi United Group-in Manchester City an lei a, nasa takin an ṭhang nghal a, Premier League title pahnih leh FA Cup title pahnih an la tawh.

Khawvel huapa Manchester City chawi sang lehtu Abu Dhabi United Group hnuaia awm Etihad Airways leh Mohun Bagan an sawi zawm a, he thuthang hi a tak a nih nghat chuan India ram football hmel thlak danglamtu a ni ngei ang. Indian Super League club Atletico de Kolkata leh Atletico Madrid an inzawm a, Indian player-te'n awmze neiin Vicente Calderon-ah training an nei theih phah a, ISL-ah an champion bawk. Etihad Airways leh Mohun Bagan hi an inthlunzawm tak tak a nih chuan Kolkata club leh Manchester City hi an inhlat lo khawp ang.

Facebook page pakhat Indian Football Team-in a tarlan dan chuan McDowell Mohun Bagan AC leh Eithad Airways te inbiakna hi thui tak a kal tawh a, inremna pawh a awm ngei dawn niin a lang.

Etihad Airways lam duh dan chu

Etihad Airways hian Mohun Bagan-a neitu nihna 75% an duh a, chairman leh official post pathum an hauh bawk.
Etihad hian anmahni thlan ngei manager leh marquee player an duh a, hlawh pawh anmahni pek tur a ni. Tin, Indian Super League a tel an duh bawk.
Etihad hian Chief Recruitment Officer-ah an thlan ngei hman an duh a, youth team pawh an thuhnuaia awm turin an duh bawk.
Etihad hian Mohun Bagan Stadium chu chei ṭhat an duh a, an home match zawng zawng an stadium chei ṭhata khelh an duh. Tin, an stadium hming chu Eithad Stadium ti a thlak an duh. Mohun Bagan hian I League home match hi anmahni ground pangngaia khel loin Salt Lake Stadium an hmang tlangpui ṭhin.
Eithad hian Mohun Bagan hi inelna khelh tura an ruahman apiang pawm turin an duh a, chung inelna chu ram danga neih tura ruahman a ni hlawm.
Etihad hian kum tinin Mohun Bagan hi cheng vaibelchhe 15 an pe ang a, hei bakah hian marquee player leh manager hlawh an pe bawk ang.
Etihad leh Mohun Bagan aiawhte United Kingdom-ah an inbe ngei nia hriat a ni a, an inremna hi official-a tarlan a la ni lo. Inremna a awm a nih phawt chuan India ram football nasa lehzuala a ṭhan besei a ni.