Liverpool-in Leverkusen an hre lo!

Xabi Alonso-a'n Bayer Leverkusen coach ni chungin a club hlui Liverpool a lenchilh a, Reds-in an club legend chungah zahngaihna an lantir lo - 4-0 ngawtin an lo sawp a, Champions League-a match li an khelh tawhah an la chak vek!

Liverpool-in Bundesliga champion an hre ve lo a, first half-ah goal khung lo mah se, second half-ah goal li an khung. Premier League hmahruaitu tan Luis Diaz chuan hattrick a siam a, Cody Gakpo chuan goal khat a thawh bawk.

Anfield-ah Bayer Leverkusen an hawihai a, German club hian second half-ah meuh chuan hnai takah Liverpool inkhel an en a ni ber - an tan Reds an sang lutuk hret a, nipui laia Alonso hnawl hnu Liverpool-in an 'second choice' Slot-a hoin inkhelh an lo zirtir.

Liverpool-in match li an khelh aṭanga hnehna chang vekin, table chung ber an luah mek a, point 12 an nei tawh. An hmabaka la awmte hi Real Madrid (home), Girona (away), Lille (home) leh PSV Eindhoven (away) an ni a, last 16 an luh ngei a rinawm tawh.

Zan thiang reh!

Anfield-ah inkhel boruak a sang ṭhin a, khawveala fans ṭha ber ang hiala inchhal Kop ho hmaah coach leh player ṭha ber ber pawh an zam ral fo ṭhin - mahse, Thawhlehni zan inkhelah fan-te au awin Liverpool player a tiphur zo lo a, first half-ah inkhel dul tak kan en.

Liverpool player a nih laia Anfield boruak vawi tam tem tawhtu Alonso-a'n Reds khelmual boruakin coach leh player-a nghawng a neih theihzia a hrechiang a, khelmual sir aṭangin a player-te chu hahdam taka khel turin thurawn a pe a, chi ai lo turin a khat tawkin a fuih reng.

3-5-2 hmanga inrem a, Liverpool goal nawr na tak tur dan chah tumtu Alonso hi first half-ah chuan a hlawhtling tih loh rual a ni lo. Reds goal nawr tur an dang chat a, ball an chanin âtthlak taka nawr pup pup an tum lo.

A tawi zawnga sawi chuan Anfield-ah Leverkusen an fimkhur a, Liverpool khelmual, thawm nat ṭhinna hmun chu, "Zanthiang reh..." tih hla ang maiin an rehtir a, Liverpool player-ten fan-te lawmna an thlen thei lo.

A goal ta

Leverkusen tana chelh reng turin Liverpool squad an ṭha lutuk hret a, chawlhlawk laia an thu ngaihthlakin Reds player-te a tiphur tih loh rual a ni lo - first half-a goal khung lo team hian second half-ah goal li an khung!

Minute 61-naah Liverpool hian goal an khung ṭan a, Luis Diaz chuan Curtis Jones-a siamsak aṭangin a khung - Merseyside club an hawikir tawh lo. Minute hnih a liam awrh a, tun hnaia 'form' tak Cody Gakpo chuan a khung ve lehnghal.

Anfield-ah Liverpool-in 2-0 in hma an hruai a, chak tur a chiang tawh tiin a sawi theih. Diaz hian a la duhtawk mai lo - minute 83-naah a belhchhah a, hun pek belhah hattrick siamna goal a khung zui.

Liverpool an chak chiang a, Leverkusen tan tun season Champions League-a an vawi khat tlawmna a ni thung - Reds-in match li aṭangin point 12 an nei a, German club-in point sarih an nei thung.

Fak phu Slot

Liverpool-in Jurgen Klopp-a thlak tur an zawn khan an biak hmasak ber chu an club legend Xabi Alonso a ni a, mahse, rin loh takin Spanish coach hian Leverkusen-a cham a thlang - Liverpool fan-ten na an ti a, tuin nge Jurgen Klopp thlak zo ang? tiin zawhna an inpe a, a chhanna an hre lo.

Reds thuneituten coach tam tak an thlithlai a, an khelh dan phung, an team rem dan leh engkim an zir chiang a, a tawpah Klopp-a system tuai hnum a, boruak sanga talbuai lo tur nia rin Arne Slot an la lut.

Liverpool hian Alonso-a'n a hnar hnu khan coach hna chiang taka an zawrh awmchhun chu Slot hi a ni a, Dutch coach hian European top five league-ah club a la enkawl bawk si loh avangin rin a hlawh lo.

Mahse, November a thlen meuh chuan Premier League leh Champions League-ah hmahruaitu an ni a, Slot-a hnuaia match 16 an khelh tawhah vawi 14 hnehna changin, vawi khat chiah an la tlawm a, vawi khat draw an nei.

Team ṭha Liverpool

Liverpool lawmna tur chu goalkeeper Alisson inhliam lai pawha a thachhang dawltu Caoimhín Kelleher a rintlak chu a ni a, Thawhlehni zan inkhelah pawh Reds tlarhmain fak an phu rualin goal chhuah lo tlarhnung hi sawi hmaih an thiang lo.

Full back-ah Konstantinos Tsimikas 'class' kan hmu telh telh a, Andy Robertson nen 'regular' takin an inchhawk thei ta. Conor Bradley a rintlak tawlh tawlh a, tlarhnung laiah Jarell Quansah leh Joe Gomez te Ibrahima Konate leh Virgil van Dijk thachhang dawl turin an rin tlak viau bawk.

Tlarhma lamah Luis Diaz leh Mohamed Salah ten goal kua ve ve an khung tawh. Diaz hian tun season inelna hrang hrangah match 15 a khel tawh a, assist vawi hnih a nei tel - Salah hian goal kua khung turin match 16 a khel a, assist vawi kua a nei thung.

Leverkusen lakah pawh goal khung lo mah se, assist vawi hnih a nei thei. Goal li khung tawh Diogo Jota inhliam laiin Cody Gakpo a lo 'form' leh chiah a, Liverpool tana a match hnuhnung pathumah goal li a khung. Dutch striker hian tun season inelna hrang hrangah match 16 khelin goal ruk a khung a, assist vawi hnih a nei - Darwin Nunez an la nei cheu bawk.