Kanan vengin ramthar an chuan MPL12 an khel dawn

Kanan veng mipuiten rei tak an lo beisei tawh, duhthu an lo sam fo ṭhin chu a tak ram a thleng ta - Mizoram football-a club inelna sang ber Mizoram Premier League-ah club an nei ve dawn ta!

MPL12 playoff-ah nimin khan Kanan FC chuan 1-0 in Chawnpui FC an hneh a, first leg-ah 3-2 a an lo hneh tawh bawk avangin inkhel pahnih belhkhawmah 4-2 in an chak - MPL an khel dawn tih a chiang.

Duhaisam MPL

MPL hmasa berah khan Kanan FC-in playoff an lo khel tawh a, mahse, a vanduai zawkah an ṭang - kum 11 zet an nghak a, tunah chuan an duhthusam an nghak chhuak ta. Veng mipui lawmna hi thua sawifiah chi a ni lo ang.

Kanan FC hian tun season-ah ADFA First Division nomawi an chawi a, hei vang hian MPL qualifier an khel - mahse, qualifier-ah Lawngtlai club MLS FC an tluk lo a, playoff an khelh a ṭul phah.

A tirin...

Kanan FC-in MPL11-a pasarihna Chawnpui FC nen playoff an khel a, Lalrindika Hmar enkawl team an nih avangin an tawh a khirh dawn tih a chiang. Mahse, tawnhriat nei ṭha Chawngthansanga kaihhruaina hnuaiah Kanan hi first leg-ah 3-2 in an chak.

Mahse, first leg inkhelah hian Chawnpui hian minute 28-na lekah player an chân a, Lalramnunmawia chu hnawhchhuah a ni. Hetihlai hian 1-0 in hma an hruai - kim loa an khelh hnuah goal thum an chhuah a, MPL9 champion hian chhuanlam tur an nei.

A tawp kharna

Nimin khan RG Stadium-ah playoff second leg khelh a ni a, Chawnpui pawhin chhuanlam tur an nei tawh bik lo - first half hun pek belhah Lalremruata'n Kanan tan goal hmahruai a khung a, chawlhlawk an hmang zui.

Second half-ah Chawnpui an 'comeback' thei lo a, Kanan FC-in an duhthusam ram inpetkaiin, season tharah MPL an khel dawn tih a chiang ta - Kanan mipuiten coach Chawngthansanga hnathawh an hre reng ang.