Pep-a 'City' ngamtu Gyokeres leh Amorim

Manchester City chu Sporting Lisbon khelmualah 4-1 in an chak lo - Portuguese club hi Manchester United manager ni mai tur Ruben Amorim enkawl an ni a, an inkhel chanchin hian sawi zui a hlawh phah hle.

Estadio Jose Alvalade-a Champions League inkhelah Man City lamin Phil Foden hmangin hma an hruai, minute lina lekah goal an khung. Mahse, Sporting hian Viktor Gyokeres-a hattrick bakah Maximiliano Araujo-a goal hmangin an chhanglet a ni.

Pep Guardiola enkawl City hian kum 2020 hnua an chak loh nasat ber ṭum an tawng leh chiah a, tun season chu an tlarhnung phui lo vangin an ke chheh a la fuh hleithei bik lo.

A hming chu Gyokeres

Nipui bazar lai khan European club lian hrang hrangin Viktor Gyokeres hi an ngaihven a, a hnim hnai zual zingah Arsenal pawh an tel - Erling Haaland neitu Manchester City erawhin an ngaihven lem lo.

Gyokeres hi chhuak mai loin Portuguese club tan a khelh chhunzawm a, tunah chuan tu nge a nih inzawh nawn a ngai tawh lo. Man City laka a goal pahnih kha penalty tia sawi nep theih deuh a ni mai thei, mahse a dang pakhat a la awm tel tlat.

Kum 26 mi Gyokeres hi Man City tlarhnungten an veng hleithei lo a ni ber a, goal a khung dawn pawhin chak taka ball a tlanpui theih bakah second tlemte chhungin keeper Ederson tana harsa tur lai a hmu hman, a khung mawi teh asin.

Swedish international striker hian season hmasa khan inelna hrang hrangah goal 43 a khung a, tun season kal laiah match 17 aṭangin goal 23 a khung - Thawhlehni zan atan bik chuan Erling Haaland aiin a lian a, a hlauhzawm zawk bawk a ni.

Amorim thukhawchang

Manchester United manager tur a ni chiang tawh a, Old Trafford a pan hmain hun tlem a la nei - chumi karah chuan Manchester City a ngam thei a, a club thar tur United ṭantute tan chuan Amorim chet dan chu mit a tlung zual ngeiin a rinawm.

Kum 39 mi Amorim chuan, "Keimah chauh ka ni lo a, team pumpui leh min ṭantute zawng zawng tan mellung pawimawh tak a ni. Hma kan sawn zel tih chu a takin kan lantir a, kan result ṭha tak hi inthlahna duhawm tak a ni bawk.

"Estadio Jose Alvalade hi kan tan chuan hmun nuam, hun hlimawm leh lungngaih thlak tak tak kan lo tawn tawhna hmun a ni. Ka hmuh dan chuan ka hun hnuhnung a hetiang tawh hi a hlu, min ṭantute vanga thleng a ni," tiin a sawi.

Amorim hian Pep Guardiola nena khaikhin chi a ni lo tih a sawi a, hmasawnna tur a la ngah hle tih a sawi bawk. Man United ṭantu ṭhenkhatin Sir Alex Ferguson nena an lo khaikhin pawh lawmawm hle mah se a phu loh thil a ni tih a sawi tel bawk.

A hautak dawn

Pep Guardiola enkawl Manchester City hi an chesual tam ngai lo, mahse tun season zet chu an chesual zing ta malh malh hle - English club hi inelna hrang hranga an match hnuhnung pathumah an chak lo vek! Tottenham Hotspur, Bournemouth leh Sporting an hneh lo.

Guardiola chuan, "Season bul ṭanna hi a harsa dawn tih kan hria a, hetiang chona hautak hmachhawn hi ka nuam tih zawng tak a ni. Kei ngei pawhin hmasawn ka ngai a, ka nauten hma an sawn lehzual theih nana puih chu ka thil châk tak a ni bawk.

"Kan beidawng dawn lo, hei chu chiang takin ka sawi lawk thei a ni," a ti a, hliam vangin an buai rih hle, hun tawp dawna Kevin de Bruyne lut thei chu an tan chanchin lawmawm a ni thung ang a, match lehpek atan beisei an nei ang.

Rodri chu tun season chhung an chhawr thei dawn tawh lo. Sporting lakah defender ṭha Kyle Walker, John Stones leh Ruben Dias te an inlan thei lo vek, Nathan Ake pawh bench lamah dah a la ngai, an ṭhat danin an la khel thei lo tih erawh hriatsak an ngai a ni.