ATP Finals khel lo tur Djokovic

Champion lai Novak Djokovic chuan ATP Finals 2024 a khel dawn lo - Serbian star hi hliam vangin a chawl mek a, a thiam zual pariat inelna aṭang hian a inhnukdawk a ni.

Kum 37 mi Djokovic hian ATP Finals nomawi hi vawi sarih a lo chawi tawh a, champion tam ber niin a sulhnu a ṭha hle - mahse kuminah erawh a duh leh tum angin thil a kal vek thei ta bik lo.

Grand Slam vawi 24 champion tawh Djokovic chua, "Theih ni se la chuan Turin khawpuia inkhelh ngei ka duh, mahse ka hliam a la dam fel theih miau loh avangin tournament ka hmachhawn ve thei dawn ta lo a ni.

"Ka inkhel en châk mi ṭhenkhatten thu min thawn ka lo hmu a, ka inlan theih dawn loh avangin an lakah hriatthiamna ka ngen. Season tharah kan inhmuh theih ngei pawh ka beisei," tiin a sawi.

Tun season chhungin Djokovic hi a khel ṭha tawk lo, match 46 a khelh zingah 37-ah chuan a chak - kum dang angin major title lak a nei lo. Mahse, tun hma aṭanga a lo suangtuah tawh Olympic gold medal a vaw chhuak thung.

ATP Finals atan hian Jannik Sinner, Carlos Alcaraz, Alexander Zverev, Daniil Medvedev leh Taylor Fritz te chu a tling hmasa panga an ni a, anni hnuah hian Casper Ruud, Alex de Minaur leh Andrey Rublev te an tling ve leh ta chiah bawk.

November 10-17 chhung hian Italy rama khawpui pakhat Turin-ah inelna hi neih tur niin, kum 2001 aṭanga chhiarin Roger Federer, Rafael Nadal leh Djokovic te tel loa ATP Finals an khelh lehna hmasa a ni ang.