Champions League-ah Real an tlawm

El Clasico-ah Barcelona-in 4-0 ngawta an sawp hnuah Real Madrid an insiamṭha lo - a kar lakah Ballon d'Or vanga lungawi lohna a tel bawk a, October thla tawp lam leh November thlatir lam chu Real Madrid tan 'lungngaih hun' a ni ber mai!

Thawhlehni zan khan Real Madrid hian Champions League-ah AC Milan chu 3-1 in an ngam lo a, Malick Thiaw, Alvaro Morata leh Tijjani Reijnders ten goal khat ṭheuh an khung - Real tana Vinicius Junior penalty chhuih luhin awmzia a nei phak lo.

Real Madrid hian match li an khelh aṭangin point ruk chiah an nei a, Italian club Milan tan pawh tun season Champions League-a an chak vawi hnihna chauh a ni - team pahnih hian point ruk ve ve an nei mek.

Vinicius inlarna

Santiago Bernabeu-ah Barca-in an sawp a, Valencia tuilian avangin kartawpah inkhel an nei lo zui. Anmahni mualah bawk Real an inlan zui a, goal thum an chhuah leh ta - fans tan chuan result duhawm lo tawpkhawk a ni.

Milan hian minute 12-naah goal hmahruai an khung a, Christian Pulisic-a siamsak chu centre back Thiaw chuan Milan tana a goal hmasa ber ni turin a tauh lut. Real an hnufual rei lo - Emerson Royal-a'n a tihtluk avangin Vinicius-a'n penalty a hlawh chhuak.

Ballon d’Or award sem zana an lungawi loh vanga an inlan loh hnua a match hmasa berah Vinicius-a'n goal a khung a, club badge fawp chungin a goal khung hi a lawm.

Mahse maw..

Vinicius-a'n club fan-te lawmna a thlen chhung erawh a rei lo. Minute 39-naah Milan tan Alvaro Morata chuan an goal hnihna a khung a, Spanish striker hian Santiago Bernabeu-ah a club hlui fan-te a ngawihtir.

Real an tho tawh lo - minute 73-naah khel ṭha em em mai Reijnders a lo lang zawk a, Rafael Leao siamsak chu Milan chak nemnghehna goal ni turin a khung a, Real khelmualah Milan-in 3-1 in hnehna an chang.

Madrid khaw club-in khawvela footballer ṭha bera an ngaih Vinícius-a'n hun harsaah a team a chhan thei lo a, boruak nei hat chunga Real pantu Kylian Mbappe-a'n beisei a phak lo chhunzawm zel bawk.

Bernabeu a reh

Real ṭantu leh club thuneituten Vinicius-a'n Ballon d'Or dawn a phu thu an sawi a, an lungawi lohna nasa takin an lantir. Mahse, hetianga boruak an neih hat hnu lawkah Real an tlawm a, Champions League match lia an vawi hnih tlawmna a nih avangin a mualphothlak.

Mbappe-a'n a match hnuhnung parukah goal khat chiah a la khung a, French striker hian beisei a phak lo chhunzawm zel. Kum 25 mi forward hian mual vei lam sira khelh nuam ti mah se, coach Carlo Ancelotti-a'n a fapa rangkachak Vinicius khelhtir nan a hmang a, Mbappe hi a laiah a din a ngaih phah.

France captain hial ni thei, 'Kei ka ni' inti ve chin ngat Mbappe-a'n Ballon d'Or dawn duhin Real a pan a, Spanish club-in ani aiin Vinicius an duhsak zawk tih a mit ngeiin a hmu - a duhna hmuna a khelh miau loh avangin beisei a phak lo chhunzawm bawk a, an buai vat lo ang tih a sawi theih loh.

Eng nge an sawi?

Real boss Ancelotti chuan, "Kan ti ṭha tawk lo a, kan khelh dan avangin kan lungngaih a hun ta. Kan inthlawp ṭha tawk lo a, team angin hna kan thawk lo. Goal kan chhuah nual a, khelmualah kan thawhhona a ṭha lo - hei hi kan siam ṭhat a ngai a ni," a ti.

Ancelotti naute hian La Liga lamah match khata khel tlem chungin hmahruaitu Barcelona chu point kuain an phak lo mek a, Champions League-a an match khelh leh tur hmasak berah hmahruaitu Liverpool an lenchilh dawn bawk.

AC Milan coach Paulo Fonseca chuan, "Ka player-ten huaisen takin he hmun hi an pan a, an thinlungah hlauhnain hmun a chang ve lo. First half-ah chance tam tak kan insiam a, second half-ah kha chuan kan bet ta hret. Mahse, theihtawp chhuahin kan bei tlang a, hnehna chan hi kan phu a ni," tiin a sawi.