Europa League: A vawi khat nan United chak thei dawn em?
Zanin dar 1:30 hian Europa League-ah Manchester United an inlan dawn a, Greek club PAOK FC an mikhual dawn - tun season Europa League-a la chak lo United-in a vawi khat nan chak an tum ang.
United-in coach Erik ten Hag an ban hnuah match hnih khel tawhin Premier League-ah ve ve a ni a, coach lailawk Ruud van Nistelrooy hoin tlawm an la nei lo - Europe-ah zanin hian fiahna an hmachhawn ve leh dawn e.
Zanin inkhel hmasa zawka Tottenham Hotspur inlan tur pawh hi en a châkawm. Spurs hian Turkish club ṭha Galatasaray chu khualmualah an lenchilh dawn a, London club hian league-ah beisei phak lo mah se, Europa League-a match thum an khelh tawhah tlawm an la nei lo.
Ruud-a United
United-in Ten Hag an ban hnuah coach turin Rúben Amorim an be fel tawh a, mahse, Sporting Lisbon coach hian November 11 hma chu United hi a zawm hman rih lo - coach lailawk Ruud-a'n a la enkawl rih dawn tihna a ni.
Dutch coach hian amah thlaktu tur awm hma chu dinhmun ṭha thei ang bera United dah a duh ang tih a chiang a, zanin inkhel tur leh, Premier League-a Leicester City hmachhawn tur a la nei - Old Trafford-ah ve ve a ni.
United hian Nistelrooy-a kaihhruaina hnuaia match li an khelhte chu mahni mualah vek an khel dawn tihna a ni a, player a nih laia striker ropui hian a hun neih tlemtêah chak loh record neih hram a duh lo ang.
United chu
Red Devils hian match thum an khelh tawhah FC Twente (1-1), FC Porto (3-3) leh Fenerbahce (1-1) an hmachhawn tawh a, an draw vek - point thum an hmu tawh a, team 36 inelna Europa League-ah hian 21-na an ni mek a, United ang club tan a ropui lo.
Hetihlai hian match hnuhnung bera hrem vanga inlan thei lo Bruno Fernandes a inlan thei tawh dawn a, Mason Mount-a'n training zawm mah se, a inlan a rinawm lo - Nistelrooy-a'n a vawi khat nana chak turin a team neih ṭhat ber a thawhchhuahpui ang.
United mikhual tur PAOK hi season hmasaa Super League Greece champion an ni a, tun season-ah pahnihna an ni mek. Hetihlai hian match thum khelh tawh aṭangin point khat chiah an la nei a, United tan chak turin PAOK chhuanvawr, Brazilian forward Taison leh midfielder Stefan Schwab te dah ṭhat a ṭul dawn.
Hei le Spurs
Tottenham-in Premier League-ah beisei phak lo mah se, Europa League lamah chuan match thum khelh tawhah an chak vek - zanina an hmachhawn tur Galatasaray hi match thum aṭanga point sarih nei tawh an ni a, lenchilh an châkawm bik lo.
Spurs hian Galatasaray an hmachhawn hmaa an match hnuhnung berah season hmang ṭha tak Aston Villa chu 4-1 ngawtin an sawp a, theihna an neih sanzia an pholang - an inringtawk sawt dawn a, zaninah chak an tum ang.
Chutihrual chuan Galatasaray hian league match 10-ah tlawm an la nei lo bawk a, Mauro Icardi, Victor Osimhen leh Lucas Torreira te ho kawltu an nih bawk avangin zuam sual theih an ni dawn.