Edu tel lo pawhin kan thil tum a pangngai –Arteta

Arsenal manager Mikel Arteta chuan an sporting director chhuak ta Edu a ui tih a sawi a, hetih lai hian Edu chhuak mah se Gunners thil tum chu a la pangngai reng tih a sawi tel bawk.

Arsene Wenger chhuah hnuah Arsenal hian indinthar an tum a, chumi tura mi pawimawh zingah chuan Edu hi a tel. A kaihhruaina hnuaiah player ṭha an lalut a, tuna an coach Arteta ngei pawh Edu hoa an lak a ni.

North London club chhuahsantu Edu chungchang sawiin Arteta chuan, "Kan ruahmanna leh thil tum chu a la pangngai reng. Arsenal hi sang taka ding tur leh ngelnghet taka hmasawn tir hi kan tum a la ni reng.

"Club chhungah hruaitu ṭha tak tak kan nei a, chung mite kaihhruaina hnuaiah chuan hmalam panin kan kal zel ang. Edu hmun ruak a zau dawn, ani kha ruahmanna nei ṭha leh kawng sialtu pawimawh a ni," a ti.