Swiatek hnehin Gauff a tlang

Coco Gauff chuan Thawhlehni zan khan Iga Swiatek a hneh a, group match khelh hmabak pakhat la nei mah se, hmeichhe tennis thiam zual pariat inelna WTA Finals khelh laiah semifinal a inhlangkai.

American player Gauff hian seeded pahnihna Swiatek hi 6-3, 6-4 in a hneh. Gauff hma hian world number 1 Aryna Sabalenka chuan semifinal a lo in vaw kai tawh bawk a ni.

Player pahnih te vawi 13 an intawnna a ni a, tun ṭum hi Gauff a chak vawi hnihna chauh a ni. Kum 20 mi Gauff chuan, "Tun hma lama kan intawn tawhna thlir chuan rinkai lo zawk ka ni a, hei chu thil mak pawh a ni hran lo.

"A tir aṭang khan ka fimkhur em em mai a, point khat lek hloh pawhin nasa takin min nghawng thei ṭhin tih kha ka hria. Set khatna ṭha taka ka khelh hnu kha chuan inrintawkna sang tak nen nuamti takin ka khel zui thei a ni," a ti.

Inkhel dangah Jessica Pegula chu Barbora Krejcikova lakah 6-3, 6-3 in a chak lo a, a match hmasa zawkah a tlawm tawh bawk avangin atan semifinal luh theih a ni tawh lo–ani hma hian Elena Rybakina chu a lo tla tawh bawk.