Pietersen-a tan England-ah hmun a awm tawh lo
February 2014-a England Cricket team tana a khelh theih tawh loh tur thu an hrilh Kevin Pietersen chu tunhnaiah che ṭha mah se England dircetor of cricket thar Andrew Strauss chuan England cricket team-ah a tan hmun a awm tawh loh thu a hrilh.
World Cup 2015-a an mualpho hnu lawk khan England and Wales Cricket Board chairman thar tur Colin Graves chuan Pietersen chu county cricket-a a chet ṭhat phawt chuan a tan England cricket team-ah hmun a awm thu a sawi a, Thawhṭanni khan county cricket-ah Pietersen hian a career-a a run siam hnem ber vawchhuakin a team Surrey tan run 326 vawchhuakin a out lo a, heti taka a che ṭha chung hian England team-ah a tan hmun a awm tawh loh thu hrilh a ni leh ta si a ni.
Field chhunga chanchin a ngah tluk zeta field pawn lama chanchin ngah Pietersen chuan, "Ka khelh ṭhat ber ṭum ala ni hial awm e, England tan a khelh leh ngei hi ka duhin ka chak a ni. Tunhma aia ka ṭhat zawk thu tunhnaiah ka sawi cham chi a, hei hi a tihchianna chu a ni," tiin triple century a hlapchhuak chu a inchhuang hle.
BBC cricket correspondent Jonathan Agnew chuan, "Dik taka sawi chuan heti zat run Pietersen-a'n a siam hi a mak hran lo. A theihna leh thiamna en chuan England tana khelh hi a phu a, England tana a khelh duh tawh loh te hi chuan thil dang vanga duh tawh lo an ni ang," tiin a thiamna en chuan Pietersen chuan England tana khelh a phu thu a sawi.
England captain hlui Michael Vaughan pawh a ṭawngchhuak a, a hunlaia khawvel batsman ṭha ber pawl Vaughan chuan, "Players khel ṭha apiang thlang mai tur kan ni. Hei hi cricket game a ni a, thil dang a ni lo, buai lohna turah kan buai a ni," tiin Pietersen chu a nungchang vang nilo a khelh ṭhat vanga England team a khel mai tur a nih thu a sawi.
England all-rounder ṭhin Andrew Flintoff chuan, "Huaisen taka thutlukna a siam avangin Strauss hian zah a phu a ni. Mahse, ka ngaihdanah chuan a thutlukna hi a atthlak a, ṭanhmun nei lo thutlukna a ni. Engvanga he thutlukna siam hi nge a nih tih hi hriat chakawm chu a ni," tiin Strauss-a thutlukna chuan a barakhaih thu a sawi.
Kum 34-a upa Pietersen hian chanchin a ngah ve hrim hrim. February 2014-a England team aṭanga ban a nih hnu lawkin ama chanchin ziahna lehkhabu tlangzarhin England cricket team-ah chuan inthliarna leh in en hranna a awm thu a lo sawi tawh a, a khelhpui ṭhin player ṭhenkhat a sawisel nual bawk. Tuna England dircetor of cricket thar, crickter hlui ve tho Andrew Strauss nen pawh hian lo inbakkaih tawhin Strauss hian vantlang hriatah ngaihdam a lo dil tawh nghe nghe.