Formula 1 Red Bull leh Renault inkar a ṭha lo

Formula one team Red Bull leh an car engine siamtu French multinational vehicle manufacturer Renault inkar a ṭha lo hle.

Kum 2007 aṭang khan Renault leh Red Bull hi an lo thawkdun tawh a, Renault hian car engine an siamsak ṭhin. An inkawp rem em em ṭhin a, Red Bull hian Formula one Constructors' Championship-ah vawi li pakhatna an nih phah tawh bakah vawihnih chu pahnihna an ni tawh.

French manufacturer hian kum 2014 aṭang khan hybrid engines an siam chhuak a, mahse he engine hi an hlawhtlinpui lem lo. Nikum khan Mercedes, Ferrari leh Williams te tluk lo in palina an ni pha chauh. Kuminah pawh beisei angin hma an sawn thei lo a, nikuma an tluk loh ngai pathum bawk tluk loin palinaah an awm mek. Constructors' Championship-ah point 30 hmu mekin hmahruaitu Mercedes chuan point 202 zet an hmu tawh thung. An driver Daniel Riccardo chu driver championship-ah pasarihna ani pha hram chauh bawk.

Hetiang a an chet chiat em avang leh an beisei leh duhang engine an neih theih si loh avang hian Red Bull chuan Formula intlansiak chu chawlh san mai an tum thu an sawichhuak hial. Tuna an contract neih laiah hian team dangte ang thoin Red Bull hian kum 2020 thleng intlansiak turin contract an neih bakah Renault nen hian kum 2016 thleng daih thuthlung an nei mek bawk.

Renault laka lungawi lo Red Bull team hian German automobile manufacturer Audi en inbiak na an nei mek tih thu thang a awm mek bawk.

Motorsport adviser Helmut Marko chuan, "Tunah hian Red Bull leh Renault inkar hi a ṭha rih lo a, Audi nen hian thuthlung ziah kan duh tawk zawk. Kan beisei leh duha ang engine kan hmu thuai thei a nih loh a, Audi nen kan inbe rem vat thei lo a nih bawk chuan Formula One intlansiak hi kan chawlhsan rih mai pawh a ngai hial ang," tiin a sawi.