I League leh hattrick

India rama football league sang ber I League-ah hattrick 46 a awm tawh a, match khata goal thum khung thei player 24 an awm a, chung zinga pariat chu Indian an ni. Mizo tlangval Jeje Lalpekhlua chu Indian zinga hattrick vawi hnih siam thei awmchhun a ni.

Hlawh tam vanga lar Odafa Okolie hi field chhugah a cheṭha a, hattrick vawi 12 zet a khung tawh. Sporting Goa tana khel mek Nigerian forward hian kum khatah nuai 300 hlawh anga sawi a ni. Hattrick siam tam lamah amah hnaihtu Ranti Martins (4) leh Muritala Ali(3) ten Okolie record hi an thlau hle.

Hnahthial tlangval Jeje hi tun season-ah Mohun Bagan tan a khel mek a, kum 2011 khan Pailan Arrows tana a khelh laiin Air India (5-2) leh Mohun Bagan (5-4) an hneh ṭumin hattrick a siam.

Punjabi forward Baljit Sahni-a'n kum 2009 khan khatih hunlaia team thar Shillong Lajong 5-1 zeta an sawp ṭumin JCT tan hattrick a siam. East Bengal tana khel mek Sahni hian Atletico de Kolkata chu Indian Super League-ah champion puiin goal hnih a khung.

2011-12 season khan Viva Kerala striker Anil Kumar chu Indian zingah I League-ah goal a khung tam ber a, hemi kum hian Air India 7-1 a an hneh ṭumin hattrick a siam.

Mohun Bagan-a Jeje kawppui Tamil forward CS Sabeeth hian Pailan Arrows tana a khelh laiin kum 2012 khan Chirag United Kerala lamah hattrick a siam a, 3-0 in an chak.

Churchill striker hlui Bineesh Balan khan 2012-13 season khan Sporting Goa 8-4 a an sawp ṭumin goal thum a khung a, hemi season hian Churchill chu I League-ah a champion pui nghe nghe.

Tun season-a Bengaluru FC tana che ṭha tak CK Vineeth hian United SC tana a khelh laiin 2012-13 season khan goal 7 a khung a, Air India 4-1 a an hneh ṭumin goal thum a khung.

Pune youth system chhuak Manipur forward Thong­khosiem Haokip-a'n tun season-a Shillong Lajong 5-2 a hneh ṭumin goal thum a khung.

2014 I League second division final round Lam­muala khelh kha thlir tan chuan Manipur winger Seityasen Singh hmuh hmaih a har khawp ang. Kum 23-a upa Seityasen hian I League season vawi khatnaah Salgaocar FC 4-2 a an hneh ṭumin hattrick a siam.