Real khelmuala lenglut tur Juventus
Zanin dar 12:15-ah Champions League final lut tur a chiang dawn. Juventus Stadium-a 1-2 a an tlawm hnu in Real Madrid-in an khelmual Santiago Bernabeu-ah Juventus an mikhual ve thung dawn a, khualmuala goal khat an neih sa avangin goal khat an khung a, goal an chhuah loh chuan an tlang thei dawn. Goal hnih an chhuah tawhna team laka goal chhuah miah lo chunga goal khat khung erawh a huphurhawm viau ang.
Team in ang lo
Champion lai Real Madrid hian tunhnai an game-ah beisei an phak lo thei hle. La Liga-a an match hnuhnung berah Valencia an draw avangin an chung chiaha awm Barcelona chu an tan um phak theihloh tluk an ni tawh a, an la beisei theih awmchhun Champions League-ah hian an champion thei lo a nih ngat chuan tun season-ah khawvela player man to leh hlawh hnem rual awmkhawmna ni siin an 'NIL' dawn. Nil an duh loh chuan Real tan zanin hi insiamṭhat hun a ni.
Real tan Valencia an khelh ṭuma inhliam Toni Kroos khelh theih dawn leh dawn loh a la chiang lo a, Luka Modric chu a khup hliam vangin khel thei lo tur chiang sa a ni. Karim Benzema pawh a hliam a dam leh ṭan tawh a, bench-ah a hmel kan hmu tura beisei a ni.
Juventus hi tun season-ah rin phak bakin an che ropui a, kum 2003 hnua a vawikhat nan Champions League Semi final an inhlangkai a, game engemawzat khelh tur a la awm tihin Serie A-ah an champion fel der a, Coppa Italia-ah final khelh an la hmabak bawk. Tunhnaia an game hnuhnung berah Cagliari an hmachhawn ṭumin an midfielder pawimawh, rei tak inhliam vanga chawl tawh Paul Pogba chu goal khat nen a lo kir a, Juventus tana thu lawmawm hi Real tan erawh hnualna tham a ni.
Eng nge an sawi?
Real Madrid manager Carlo Ancelotti chuan, "Kan vanduai vangin Valencia kha kan draw a, Valencia kan khelh ṭuma kan khelh ṭhat ang khan kan khel a nih chuan Juventus hi kan hneh thei ang tihah hian ka chiang a ni," tiin Champions League final luh theih a la inbeisei hle.
Juventus coach Massimiliano Allegri chuan, "Madrid-ah game harsa tak khel turin kan zinchhuak dawn tih ka hria a, inkhel hmasa a innghat thei kan ni tawh lo. Goal thun tumin na takin min nawr dawn tih hi thil chiangsa a ni a, dan chah dan kan ngaihtuah a ngai dawn a ni," a ti.