CYMA Football Lengpui an tlo, Dinthar leh BVT pawh chak chiang
Lengpui, Dinthar leh Bethlehem Vengthlang ten an khingpui ṭheuh hnehin C.T Group Cup Inter Branch YMA Football Tournament 2015 Round of 16 an paltlang.
Nimin inkhel hmasa berah Laldintluanga hmangin Thingsulthliah Diakkawn-in Dinthar muthlu an kai tho chiang hle. Dintluanga hian minute 28 naah an hmahruaina goal khung mah se he goal hian Dinthar a chhaih thinur a, Dinthar lam hian Lalkhawpuimawia goal hnih leh Samuel Laltlanthanga goal khat hmanga chhang letin 3-1 in an chak.
NECS CUP 2015 an tlak tuk aṭanga CYMA Football atana inbuatsiah ṭan Bethlehem Vengthlangin an inbuatsaihna ṭhat zia an pholang zel. Nimin inkhel vawihnihnaah Lalzatluanga, Zothanmawia leh K Lalṭhathanga te goal khat ṭheuh thum hmangin Aizawl Venglai 3-0 in an hneh. Aizawl Venglai hian an tlarhnung rem fuh loh an tuar a, BVT lamin an goal ven thiam leh goal thun thiam an chak pui thung.
Inkhel hnuhnung berah Aizawl khawpui pawn team ṭha Lengpuiin 3-0 in Leitan an hneh bawk. Lengpui tan hian Aizawl FC midfielder Rohmingthanga a thawhhlawkin an chakna hnar ber pawh a ni. Shillong Lajong player hlui hian first half-ah goal hmahruai khungin Lengpui hma a hruai pui a. Lalremsanga leh Zonenhlua te'n goal khat ve ve thun belhin Lengpui an chak chiang hle.
NIMIN INKHEL RESULTS
Thingsulthliah Diakkawn 1 - 3 Dinthar
Thingsulthliah Diakkawn : Laldintluanga 28'
Dinthar : Lalkhawpuimawia 34' ; 88' ; Samuel Laltlanthanga 75'
Bethlehem Vengthlang 3 - 0 Aizawl Venglai
Bethlehem Vengthlang : Lalzatluanga 31' ; Zothanmawia 51' ; K Lalthathanga 76'
Leitan 0 - 3 Lengpui
Lengpui : Rohmingthanga 18' ; Lalremsanga 75' ; Zonunhlua 90+2'
Quarter final khel tur
a hriat kim dawn ta
Vawiin hian last 16 chinfel a ni dawn a, inkhel pathum a awm leh dawn. Tualchhung football ngainatu tan Lammual pan a inchhirawm loh khawp ang.
Zing dar 10:00-ah ṭum thum a zawna penalty shootout hmanga chak tawh Durtlang North an inlan dawn a, champion tura rinkai Ramhlun South hnehtu Durtlang North hian Bungtlang an tum dawn. Mipui ngaihven tak inkhel a ni dawn lo a, amaherawhchu a chak hian quarterfinal an lut dawn. Chu stage chu team ṭha tam tak thlen theih loh a ni.
Chawnpui hi veng leh veng inelnaah lar hluai lo mah se ADFA second division-ah inelna pahniha champion Chawnpui FC awmna veng a ni. An khingpui tur Armed Veng South erawh sulhnu an nei ṭha nachungin CYMA football-ah an la champion lo, MPL-a tawnhriat nei an kawl nual avangin team ṭha zawka ngaih an ni.
Bawngkawn hi player hming en ringawt a team ṭha ber an ni hial ang. Veteran player Lalremruata'n midfield-ah a ho thei a - Aizawl FC, Chanmari FC leh Dinthar FC tana player pawimawh an kat nuk mai.
An khingpui tur Chanmari West erawh MPL club awmna veng an ni a, MPL tawnhriat nei player 11 awlsam taka chhawp chhuak thei an ni. Team pahnih hi ṭantu ngah an ni
VAWIIN INKHEL TUR
10:00 AM Bungtlang Vs Durtlang 'N'
12:00 PM Chawnpui Vs Armed Veng 'S'
02:00 PM Bawngkawn Vs Chanmari 'W'