Football Writers' Association player of the year-ah Hazard

April thlaa PFA Player of the year lawmman dawngtu Eden Hazard-a'n chawimawi­na dang a dawng leh ta a, Football Writers' Association player of the year-ah thlan a ni. Award dawmg tur hi sports journalist 300 chuangin an thlanchhuah a ni.

Kum 24-a upa Belgian winger hian 53% vote hmu in a hmu sang fal hle a, Tottenham Hotspurs striker Harry Kane leh Chelsea-a a khelhpui John Terry te'n an dawt a ni.

FWA chairman Andy Dunn chuan, "Award dawng thei tur hian footballer ṭha tak tak hming kan chhawpchhuak ṭeuh a, Hazard hian a dawng ta a ni. Ṭhiante tana goal thun tur siamsak mai bakah goal a thun thei em em a, player thawkrim tak Chelsea champion na kawnga sulsutu ber a ni," tiin tun season-a goal 20 khungtu Hazard chu a fak.