Inter mualah Arsenal an chak lo

Arsenal chu tun season Champions League bikah a vawi khat nan an tlawm - Nilaini zan khan Inter Milan mualah an lenglut a, midfielder Hakan Calhanoglu-a penalty khung hmangin Italian club hi 1-0 in an chak.

Mikel Arteta nauten a chhanletna tur an nei lo a, kut bengin San Siro an chhuahsan. Inter Milan erawhin match li aṭanga point 10 hmuin, team 36 inel zingah pangana dinhmun an luah - hmahruaitu Liverpool an phak lohna chu point hnih a ni.

Penalty pakhat

Arsenal lamin an tlarhnungah William Saliba, Gabriel, Ben White leh Jurrien Timber an tlar thei a, si ban nghaktu chu David Raya a ni bawk, season hmasa lama an tlarhnung phui ang kha neih theih an inbeisei ngam.

Mahse, Declan Rice chu a zin ve thei lo a, an ṭhat dan tak erawh a ni kim lo. A tir lamah Inter Milan chuan na takin an nawr nghal a, wing back ṭha Denzel Dumfries chuan hnai tak aṭangin bar a tihper dawp.

Chawlhlawk hma hretin Gunners lamin penalty an chawi, midfielder Mikel Merino chuan a kutin a khawih palh - Video Assistant Referee (VAR) hman a ni a, an pe tlang! A pettu Calhanoglu chuan Raya zuan lohna lamah a khung.

Goal hmaah Premier League club an vannei tawk lo, corner aṭanga ball kal chu Gabriel-a'n ṭha zetin tauh mah se, goal line a pelh hmain Dumfries chuan a lo dansak hram a, vannei takin mualneitu an him.

Kai Havertz-a pet kum mawi tak mai pawh Inter Milan keeper Yann Sommer chuan a lo dansak a, German forward remchang neih dang leh pawh defender Yann Bisseck chuan a lo dang leh hman a, inkhel thununa ball chang tam zawk Gunners an che fuh thei lo.

Inzaghi a lawm

Inter Milan coach Simone Inzaghi-a'n goal an neih hnuah khung belh aiin a venhim a ngaipawimawh zawk a, a tum leh duh ang ngeiin an venghim tluan thei, a naute khelh danah a lawm hle.

Inzaghi chuan, "Arsenal lakah goal kan chhuah lo a, a hmain Manchester City nen inkhelin goal kan chhuah lo bawk. English team ṭha pahnih lakah goal kan chhuah lo a nih chuan kan khel ṭha tih a chiang," a ti.

Arsenal khan goal khung tumin vawi 21 ngawt an pet a, mahse Inter Milan tlarhnung an phui ṭha tlat - goal zawna ball kal a awm pawhin goalkeeper Yann Sommer a chesual duh tlat lo, a lo chingfel thei zel.

Italian manager Inzaghi chuan, "Khelmual chhunga lut player an khel ṭha vek, mimala fak tur bik awm lo mah se Bisseck khan a tih tur a hlen chhuak ṭha, a awmna lam kha Arsenal min nawr natna a nih avangin a hna kha a hautak hle," a ti.

Inter Milan hi Serie A champion lai an ni a, league lamah pahnihna ni mekin Napoli nen an inel mek. Champions League-ah pawh team hmuhnawm berte zinga mi an ni a, tuna an khelh chin aṭanga chhut chuan champion tum ngam tur zinga mi an ni ang.

Pawm a harsa

Tun hnaiah Arsenal an chefuh hleithei lo, coach Mikel Arteta chuan inkhel thunun leh goal khung theihna remchang an insiam chunga Inter Milan an hneh lo chu pawi a ti a, pawm thiam mai pawh harsa a tih thu a sawi.

Gunners manager Arteta chuan, "Merino tan khan a ban lak sawnna hun a awm lo, goal hlauhawm a nih loh bakah tihpalh thil a ni bawk - penalty an pe miau si a, kan sawiselin awmzia a nei phak hek lo. Mahse, khatiang kha penalty an pe a nih chuan, Merino khan penalty hlawh ve tur a ni.

"Min tehna ngai bawk khan Merino chunga thil thleng kha teh ni ila chuan 1,000% a penalty ve tur tho a ni," a ti. Spanish midfielder hi box chhungah tihtluk a ni a, ball an inchuhna lamah a luah an hnek a, amaherawhchu penalty an pe lo.

North London club hian tun season UCL bikah a vawi khat nan goal an chhuah a, an tuar thiam lo viau. Match li aṭanga point sarih hmuin 12-naah an awm mek a, a thiam zual 16 zinga tel turin an dinhmun a la ṭha, chutihrualin playoff khelh ngai lo tur chuan hmasawn an ngai.

Arteta naute hian kar tawpah Premier League match hautak an khel zui leh nghal dawn - tun hnaia insiamṭha Chelsea hmachhawn turin Stamford Bridge an pan dawn a, London Derby hmuhnawm en tur kan nei leh dawn tihna a ni.