Goal nga khungtu Barca an chak

Tun season-a goal khung uar em em mai Barcelona chuan Champions League-ah goal nga an khung leh ta - Nilaini zan khan an mikhualna ramah Red Star Belgrade chu 5-2 in an sawp a, Champions League match thum chu a zawnin an chak ta a, 1959-60 hnua European club inelna sang bera match thum chhung goal thum aia tam an khung vawi khatna a ni bawk.

Barcelona tan Robert Lewandowski chuan goal hnih a khung a, Inigo Martínez, Raphinha leh Fermín López ten goal khat ṭheuh an khung - mualneitu team tana Silas Katompa Mvumpa leh Milson goal khungin awmzia a nei phak lo.

Catalan club tan Jules Kounde chuan hattrick a siam a, a hattrick siam dan erawh assist a ni. French defender hian Lewandowski, Raphinha leh Fermin Lopez te goal khung tur chu a siamsak vek a ni.

A goal hma

Red Star Belgrade khelmualah goal kan hmu hma a, Barca tan minute 13-na lekah Inigo Martinez chuan Raphinha freekick aṭanga ball kal chu tauh lutin goal-ah a chantir a, 1-0 a ni der.

Mahse, Red Star lam an awm mai mai bik lo. Minute 27-naah Silas chuan mawi zetin an si phurh a sut a, an hun ṭha neih hlah nasatu Barca an hawihai. A bik takin Raphinha-a'n chance a hlah nual hman a, a inthiam lo rilru hman mai thei!

Goal dang lut loa chawlhlawk hman erawh Barca-in an duh lo. Hansi Flick-a hnuaia goal khung uar thar leh mek Lewy chuan Barca hmahruai nawnna goal a khung a, 2-1 in chawlhlawk hman a ni.

Goal a sur

Chawlhlawk laiin Flick-a'n Barca a fuih ṭha tih a chiang - second half ṭan aṭanga minute riatna lekah Lewy a lang lehnghal a, Polish striker hian Kounde siamsak chu Barca goal thumna ni turin a khung.

Minute hnih a liam awrh a, Raphinha-a'n first half-a a tihsual thup nan a khung ve leh a, 1-1 ni hman kha, 4-1 in Barca-in hma an hruai leh der tawh. Hetah pawh an la duhtawk lo cheu - minute 76-naah Fermin Lopez-a'n an goal ngana a khung zui.

Red Star-in minute 84-naah Milson hmangin goal mawi bik khung ve leh mah se, goal an chhuah tam hman hret a, mualpho zualpui khuhna chauh a chang a, Barca an chak chiang.

A hming Lewy

Barca chak zanah goal hnih khungtu Lewandowski a langsar a, kum 36 mi striker hian tun season inelna hrang hrangah match 16 khelin goal 19 ngawt a khung leh der tawh - striker ṭha takin season tluana a goal khung zat ang chu a tling leh der tawh!

Lewandowski-a'n Champions League-ah goal 99 ngawt a khung tling ta a, Borussia Dortmund, Bayern Munich leh Barcelona tan Europe-a club inelna sang berah hian a inlan tawh - goal 100 khung thei pathumna ni turin goal khat chiah a mamawh ta.

Lewy hma hian Cristiano Ronaldo (140 goals) leh Lionel Messi (129) te chuan Champions League-ah goal 100 an lo khung tling tawh a, player ropui bik pahnih kiangah Lewy-a'n a hming a ziak kai ve dawn e.