Sports minister chungah MWA-in lawmthu an sawi

Mizoram Arm-Wrestling Assocaition (MAWA) chuan nimin khan thuchhuah an siam a, tun hnaia Mizo infiammite hlawhtlinna chan chungchangah sports minister Lalnghinglova Hmar chet danah lawmthu an sawi.

MAWA chuan thuchhuah siamin, "Pu Lalnghinglova Hmar, Minister of State, Sports & Youth Services Department etc. in Asia Arm-Wrestling International Cup-a Mizo medal late lawmpuina hun, ni 05.11.2024 (Thawhlehni) a min buatsaihsak hi lawmawm kan ti a.

"Incentive Cash award-ah Arm Wrestling a tel tawh tur thu leh, tun inelna-a medal late an hlawhtlinna phu tawk sawrkar hna ngaihtuahsak an nih tur thu a puang hi Mizoram Arm Wrestling Association chuan lawmawm a ti takzet a ni.

"Kan Sports Minister zahawm tak hi sawrkar tirh aṭanga Arm Wrestling hmasawnna ngaihtuah a, ṭhahnemngai taka thawktu a ni a. Tun hnaiah chanchin kimchang hre lo te aṭanga beihna a tawk hi pawi kan ti a, association leh infiammite min ngaihsaknaah lawmthu kan sawi a ni," an ti.

Ocotober 19-26 chhung khan Mumbai-ah Asian Arm-Wrestling International Cup neih a ni a, hemi ṭum hian Denic Lalruattluanga chuan gold medal lain, midang pahnih Benjamin Lalawmpuia leh Vanramnghaki te chuan bronze medal an la ve ve bawk.