Semifinal-ah Zheng a lut

Zheng Qinwen chuan Jasmine Paolini hnehin WTA Finals khelh laiah semifinal a lut a, inkhel dangah a thiam pali zinga tel chiang tawh Aryna Sabalenka erawh Elena Rybakina lakah a chak lo thung.

Chinese nula Zheng hian chak ngei ngei pawimawhna inkhelah Italian player Paolini hi 6-1, 6-1 in a hneh, group match hmasa berah Sabalenka hneh lo mah se a hnuah a zawnin vawi hnih a chak.

Kum 2013 khan Li Na chuan WTA Finals-ah hian semifinal a lo lut tawh, ani hnuah chuan Zheng hi Chinese nula zinga hetiang ti leh thei hmasa ber a ni hial a, an ram tan chuan chanchin lawmawm a ni.

Olympic gold medalist Zheng chuan, "A nihna takah chuan WTA Finals ka khel ringawt pawh hi ka tan chuan a sang tawk tawh hle a, nuam ti taka tournament khel turin ka pen chhuak tawp mai kha a ni a, tunah chuan semifinal hial ka thleng ta.

"Kan group ka en khan ka tan kawng a harsa dawn tih ka hria, group lehlam ka dah hniam vang ni loin ka tan chuan ka awmpuite kha hmachhawn harsa chi zel an ni, chumi aṭanga ka tal chhuak thei hi ka lawm," a ti.

Inkhel dangah Sabalenka chuan Rybakina chu 6-4, 3-6, 6-1 in a hneh lo, player pahnihte hi semifinal atana tling chiang tawh leh tla chiang tawh an nih avangin an inkhel result hian awmzia a nei thui tawh lo.

Group lehlam aṭangin Coco Gauff chuan semifinal a lut chiang tawh a, nizan khan a group match hnuhnung ber atan Barbora Krejcikova a hmachawn a, inkhel dangah chak mamawh Iga Swiatek leh Daria Kasatkina te an intawng ve bawk.