Barkley khumtu Steph Curry

Steph Curry chuan point neih tam lamah NBA legend Charles Barkley a khung a, mellung pawimawh a phun ṭum hian a team Golden State Warriors chu Boston Celtics lakah 118-112 in a chakpui.

Kum 34 mi Curry hian point 27 a nei a, basketball inelna lian berah hian point 23,747 a nei tling ta chiah a, point neih tam lamah hian kum 61 mi Barkley khumin 30-naah a awm ta chiah.

Barkley hi NBA Hall of Fame zinga mi a ni a, player hmuhnawm bik Curry-a ngaisang lem lotu a ni thung - tun season ṭan dawn pawh khan Golden State an ṭhat tawk loh thu bakah team naran mai a nih thu a lo sawi tawh a ni.

Mahse, Golden State Warriors hian beisei phak bakin regular season an ṭan fuh a, team ṭha Boston Celtics lakah pawh an chungnung, vawi sarih chak tawhin ṭum khat chiah chak loh an la nei.

Nimin zing inkhel dangah Cleveland Cavaliers chuan New Orleans Pelicans chu 131-122 in an hneh a, tun season bul an ṭan fuhin match vawi kua an khelh tawhah an la chak vek, an club record thar a ni hial.

Los Angeles Lakers erawh Memphis Grizzlies lakah 131-114 in an chak lo - an thiampuipa LeBron James chuan point 39 ngawt nei mah se chakpui nan a tawk zo ta chuang lo a ni.

Lakers coach JJ Redick chuan, "James hian kum 40 a tling dawn hnai tawh, chutiang chung chuan inkhelhna hmuna thawkrim leh bei nasa berte zinga mi a la ni reng, a lak aṭangin midang pawhin zirtur an nei," a ti.